January ni 6, 2016 khan AR Lammualah Mizoram XI chuan German Students National Football Team an mikhual a, mikhual team-te hian 3-1 in mualneitu Mizoram Team-te chu an hneh a ni.
Santosh Trophy atana inbuatsaih mek Mizoram Team-te chuan inbuatsaihna hun nei tam lo mahse tha takin German Team-te hi an lo hmachhawn a. A tir lamah khel nawi deuh mahse second half lamah erawh Mizoram an khel tha hle a ni.
German Team tan striker Wohlfarth chuan goal hmahruai a khung a, first half-ah goal hnih a lut a, goal hnuhnung zawk hi darkar chanve khelh tlin hma hreta Phul Weimer-a khung a ni. Mizoram hi an bet dawn viau emaw tih laiin Malsawmfela hmangin goal khat an khung a, inkhel nung thar leh hle mahse hun tawp dawn minute 7 la awmin Ralf Kettemann chuan German Team goal thumna a khung a, 3-1 in an chak ta a ni.
Mizoram 1-3 German Students National Football Team
(Malsawmfela 56' pen) (Steffen Wohlfarth 8' pen', Phil Weimer 25', Ralf Kettemann 83')
Mizoram XI : Lalremruata, C Ramdinmawia, Lalrinzuala Khiangte, Lalrozama Fanai, MS Dawngzela, Joseph Lalnunpuia, Lalnuntluanga, R Laldanmawia, Malsawmfela, MS Dawngliana, Lalnunmawia
Germany XI : Arne Kampe,Dennis Bührer, Adam Fall, Christopher Heermann, Tommy Kind, Eugen Schuiffmann, Nico Schneck, Phil Weimer, Mathias Header, Steffen Wohlfarth, Kevin Schulz
Goal a lut hma hle a, goal hmasa ber hi penalty atanga lut a ni nghe nghe. Mizoram full back Lalrinzuala Khiangte chuan Steffen Wohlfarth chu box chhungah a titlu, referee chuan penalty a ham a, tan atanga minute 8-na lekah Steffen Wohlfarth chuan goal a khung ta.
Goal hnihna hi set piece atanga lut a ni a, Adam Fall-a free kick tha zet chu Phil Weimer chuan 25 mins-ah chiang takin a tauh goal. First half-ah goal dang a lut tawh lo. Second half tan tirah Mizoram an khel a mawi a, goal hlauhawm pawh an nei ve nual. 56 mins-ah Mizoram chuan corner an hlawhchhuak a, he corner-ah hian Dennis Bührer chu a handball hlauh mai. Referee chuan penalty a ham a, he penalty hi Malsawmfela chuan goal-ah a chantir.
Hun tawp dawn minute 7 la awmin Steffen Wohlfarth-a siam tha zet chu box chhung atangin Ralf Kettemann chuan chiang takin a pet goal a, 3-1 in German Students National Football Team-te chuan hnehna an chang ta a ni.
First half-ah Mizoram game-in awmzia a nei lova, goal shot vawi hnih chiah an nei, hei pawh hi goal zawnah a kal lo nghe nghe. Mizoram Team-te hi December thla tawp lam atanga practice tan an ni a, MPL club atanga player-te hi khawm an ni. Hun chep tak karah theih tawp an chhuah a, Mizoram Manager Pu Lalbiakzuala chuan,"Kan hun neih tam loh dan leh game kan khelh tam loh ngaihtuah chuan 3-1 chu results duhawm tak a ni," tiin chak lo zawk pawh nise an result-ah a lawm thu a sawi.
German Team-te hi technique sang tak tak an ni a, pumruaah pawh an lian zawk bawk a, Mizo player-te tan chuan hmachhawn hautak tak an ni reng a ni. Mizoram Team-ah hian India Youth Team-a khel thei 5 vel chauh an awm laiin German Team-ah hian Germany Youth Team-a khel thei 10 dawn lai an awm a, heng atang hian an class a insan hleih dan tur chu a hriatthiam mai a ni.
Tin, German Team-te hian an duhthusam football an khel thei bik lova, University hrang hrang atanga lakkhawm an ni ve bawk a, Germany atanga Mizoram an rawn thleng chu an chau hle nghe nghe a, an match neih hma zan chiah mumal taka an mut theih hun awmchhun a ni a, chuvang chuan match hmuhnawm tak mipui ten an beisei ang an khel chhuak zolo niin a lang bawk a ni.
pictures credit : PC Lala