Toni Kroos chu German Footballer of the Year atan an thlang a, Kroos hian he chawimawina hi a vawi khat dawnna a ni.
Germany rama infiamna lampang ziaktute chuan Real Madrid star hi Footballer of the Year atan hian an thlang a. 2016-17 khan Kroos hian Philipp Lahm a tluk pha lo a, kuminah erawh football thiam berah hian an thlang ve ta a ni.
Association of German Sports Journalists (VDS) chuan football magazine Kicker nen tang kawpin footballer tha hi an thlang a. German midfielder hian vote 475 ah vote 185 ngawt mai a hmu a, he chawimawina hi a dawn theih phah a. Tun tum hi he chawimawina dawng tura Toni Kroos an thlan hmasak ber a ni.
Kum 28-a upa Kroos hi Real Madrid in a zawna kum thum chhung UEFA Champions League title an lak theihna kawnga player pawimawh berte zinga mi a ni a. May thlaa Kiev khawpuia 3-1 a Liverpool an hneh bakah Real Madrid hi UEFA Super Cup, Supercopa de Espana leh Club World Cup title te a lakpui bawk a ni.
Freiburg striker Nils Petersen chuan vote 39 hmuin pahnihna dinhmun a luah a, vote 38 hmuin pathumnaah Schalke defender Naldo chu a awm bawk.
Kroos chuan, “Footballer of the Year han nih chu a nuam ka ti a, a ropui ka ti hle mai a. He chawimawina hi duh duha dawn ngawt theih a nih loh mai bakah mi zawng zawngin an dawn theih a ni lo a, chu vangin ka ngaihlu leh zual a ni,” a ti.
Bayern Munich boss hlui Jupp Heynckes chu Domenico Tedesco aiin vote 2 in a sang zawk a, Coach of the Year atan an thlang a. Kum 73-a upa Jupp Heynckes hian nikum October thla khan Carlo Ancelotti chu thlakin a vawi 4-na atan Bayern Munich a enkawl leh a. Jupp hian Bayern chu Bundesliga title lakpuiin, a zawna vawi 6 an lakna a ni a. Domenico Tedesco hian Schalke chu pahnihna a nihpui bawk a ni.
Jupp Heynckes chuan, “Chanchinbumiin Coach of the Year atana min thlang hi ka lawm hle mai a, min vote lo tute zawng zawng hnenah lawmthu sawi ka duh a, Bundesliga chhungah hian kei ni lo coach tha tak tak an tam a, kei aia he chawimawina dawn phu zawk hi an awm teuh a ni,” a ti.
Dzsenifer Marozsan chu hmeichhe Footballer of the Year atan an thlang a, Dzsenifer hian Lyon chu Champions League title a lakpui a ni.