Barcelona leh Spain midfielder Gavi chu a ACL zai a ngaih dawn avangin tun season chhungin a inkhel thei tawh dawn lo tih Barcelona chuan an puang.

Spain tana a fehchhuahnaah Gavi hi a inhliam a, Euro 2024 qualifier game-a Spain in 3-1 a Georgia an hneh tum khan kum 19 mi hian a khup a ti na a, Barcelona-ah kirin a khup hi endik a nih hnuah ACL injury a nei tih hmuhchhuah a ni.

Barcelona chuan Gavi-a ACL hi a thler vek (complete tear) thu an tarlang a, zai a ngaih dawn avangin thla 8 atanga thla 10 chhung vel a chawlh a ngai dawn a, tun season-ah a tan inkhelh leh ngaihna a awm tawh lo.

Gavi hi nakkum Euro khel turin a dam hman dawn em tih a sawi theih loh bawk a, thla 10 thleng pawh chawl thei dinhmuna a din avangin 2024-25 season bul pawh a tan thei lo maithei a ni.

Gavi hian Barcelona tan game 111 khel tawhin, goal 7 a khung tawh a, assist vawi 12 nei tawh bawkin, Spain tan hian vawi 27 a inlan tawh a, goal 5 a khung tawh.

Georgia lakah hian Gavi hi 26mins-a lak chhuah a ni a, nakkum Euro mai ni lovin, Paris Olympics-ah pawh a ram ai a awh thei lo maithei bawk a ni.