Pathianni zan khan Euro Qualifier match-ah Spain chuan 3-1 in Georgia an hneh a, Barcelona midfielder Gavi chuan a khup a tihliam palh hlauh mai.

Kum 19 mi hian ball a khalhna lamah a khup a tisual palh a, minute 26-na lekah lakchhuah niin, mittui nen mual chhung a chhuahsan.

AS-in a tarlan dan chuan Gavi hliam hi a na hle a, zai pawh a ngai hial maithei a ni. Heti a nih chuan Barcelona tan a inlan thei lawk dawn lo tih a chiang. Spain national team doctor Oscar Luis Celada pawhin Gavi hliam hi a nat thu a sawi a, an buaipui nghal mawlh mawlh a ni.

Engtia rei nge a chawlh dawn tih erawh a la hriat loh. Gavi hian ram tan game 27 a khel tling tawh a, Spain tana player pawimawh a ni chho mek. Barcelona tan game 111 a khel tling tawh bawk.

Spain hi Euro-ah a inpet tling tawh a, hnehna nen an game hnuhnung ber an khar a. Georgia an hmachhawn tum hian Le Normand leh Torres ten Spain tan goal an khung bakah, Lochoshvili  chuan an lamah a ti goal bawk a, Georgia tan Kvaratskhelia chuan goal khat a khung ve bawk.