05 Dec 2018 08:28

inkhel

Gautam Gambhir-a’n cricket khelh a chawlhsan dawn

Indian cricketer Gautam Gambhir chuan Thawhlehni khan cricket khelh a chawlhsan thu a puang a, eng inelnaah pawh ni se tel a tum tawh lo tih a puang a ni.

Gautam Gambhir hian India aiawhin Test 58, ODI 147 leh T20I 37 a khel hman a, opener tha tak mai hi South Africa-a 2007 World T20 ah khan top scorer niin, 2011 ODI World Cup-ah pawh top scorer a ni bawk a, heng inelna pahnihah hian India chu a champion pui ve ve a ni.

Kum 37-a upa Gambhir chuan, “Thutlukna siam harsa ber berte hi thinlung rit tak chunga siam a ngai fo thin a. Tunah pawh hian rilru leh thinlung pik tak chungin cricket khelh ka tum tawh lo tih ka puang a, he hun hi hman atanga ka tawn tlang huphurh ber a lo ni tawh a ni,” tiin social media ah a tarlang.

Gambhir hian minute 11 vel zeta sei video siamin a post a, “Ranji Trophy game chu Andhra-a khelh tur a ni a, hei hi ka khelh hnuhnun ber tur a ni dawn a. Bul ka tanna Feroz Shah Kotla ground-ah a tawpna hun pawh ka hmang dawn a ni,” tiin a sawi.

Indian batsman hlawhtling berte zinga mi Gautam Gambhir hi a tlakhniam deuh avangin India team-ah pawh a lang tam lo tial tial a, Test a khelh hnuhnun ber phei chu 2016 a England nen an inhmachhawn kha a ni.

Test 58 khelin run 4154 a siam hman a, a run siam average hi 41.95 a ni a. ODI game 147 khelhah run 5238 a siam bakah T20 International vawi 37 khelhah run 932 a siam hman bawk a ni.

Left-hander hian first class cricket chu kum 15 chuang a khel hman a, match 197 khelin run 15,041 zet a siam a. List A run bik chu 10,077 a tling a ni.