14 Oct 2020 05:04

inkhel

Gautam Gambhir: 39

Indian cricket legend Gautam Gambhir chuan vawiinah hian kum 39 a tling ve ta a, he mi denchhen hian a zinkawng lo zawh tawh zinga chanchin langsar zual thenkhat han tar lang ila.

Khawvela left-handed batsman zinga tha ber pawla sawi Gautam Gambhir hi ‘match-winner’ ti hiala sawi a ni a. 2007 World T20 leh 2011 World Cup ah te India an champion theihna bulpui a ni.

A vanglaiin India cricket team chu dinhmun sang takah a dinpui fo a, ram dang lakah an theuneu loh zia an lantir fo thin a ni.

Kum 13 dawn cricket a khelh chhungin Gambhir chu India team-ah pawh a langsar pawl a ni chho thei a. Test bikah phei chuan opener a ni deuh zel a, Virender Sehwag nen bul an tan hnem hle.

Test 58 a khelhah run 4,154 zet a siam thei a, century vawi 9 siamin a average chu 41.95 a ni a. ODI lamah pawh run 5,238 siamin, T20I ah run 932 chu a siam hman bawk a ni.

Gautam Gambhir leh Virender Sehwag te inkawp chu Test bikah India tana a tira inkawp zinga run siam hnem ber an la ni a. Anni pahnih inkawp hian Test run 4,412 zet chu an siam dun hman a, format dang nena chhiar chuan pahnihna niin, Sachin Tendulkar leh Rahul Dravid te inkawp (run 6,920) chiah tluk loh an nei a ni.

Gambhir hian 2008 leh 2011 inkarah khan chanchin sawi tur a nei hnem viau a, 2010 ah khan Indian cricketer zingah chuan Test khelhah a zawnin century vawi 5 a siam a, hetianga ti thei hmasa ber hi a ni a. Don Bradman chuan vawi 6 a siam thei a, a chungnung ber a, Gambhir bakah Mohammad Yousuf leh Jacques Kallis te chu pahnihnaah hian an awm.

Indian cricketer zingah chuan Gambhir chiah hi a zawna century vawi 5 siam thei a la ni a, Sunil Gavaskar, Rahul Dravid leh Sachin Tendulkar te chuan vawi 4 an siam thei a ni.

2008-09 ah khan Gambhir chu Australia, England leh New Zealand te nen an inkhelhah run siam hnem ber a ni char char a. 1968 hnua New Zealand rama India an chak leh hmasak ber tum pawhin Gambhir hi player langsar ber a ni.

IPL lamah pawh Gambhir hian boruak a nei tha hle a, Delhi Capitals ah bul a tan a, a hnuah Kolkata Knight Riders a zawm leh a. 2012 leh 2014 ah khan Kolkata Knight Riders chu IPL title a lakpui a ni.