Wales forward Gareth Bale chuan 2013 khan khawvela Football Club ropui ber pakhat Real Madrid a zawm a, Tottenham atanga Real Madrid-in Bale an leina man kha British Media te chuan £85.3 million lai a nih thu an tarlang.
Khawvela Footballer man to ber Ronaldo-a record chu Bale hian a khum ta bawk a, Real Madrid tan game 73 khel tawhin goal 41 lai a khung tling tawh a. Kum 26 mi hi Real Madrid innghahna lai mu a ni chho zel dawn niin a lang.
Khawvela Footballer man to ber ni tur hian Bale hian Southampton leh Tottenham-ah theih tawp a chhuah a, Real Madrid a pan hnu pawhin inhliamnain tlakbuak thin mahse rim taka a thawh thin avangin tunlai Footballer ropui ber zingah a inhlangkai chho mek zel a, a ram Wales chu hun rei tak tournament lian an khelh loh hnuah Euro 2016 khel turin a hlangkai ta bawk a ni.
Inkhelh hmaa inbuatsaihna a pawimawh ang bawkin inkhelh laia inthununna a pawimawh bawk a. FFT-in an kawmnaah Bale chuan inkhelh hmaa a inbuatsaih dan leh match a khelh laia a inthunun dante a sawi chhuak.
1. I hmelmate hrechiang rawh : An chak lohna zirchiang la, an chhiatna zawn tur.
"Kan khingpuite zirchiangin coach te nen team inhmuhkhawmna hun kan nei thin. Engtin nge team anga an khelh dan leh an player mal tha bikte theihna; tihte chu nasa takin kan zir ho thin. Chung meeting atang chuan kan khingpuite chak lohna lai kan hre thei ta a, khawi laiah tak nge chhut tur tih thlengin.
"Kan lo inhmachhawn tawhnate kan thlir let a, an defender-te laka kan chet that thin chuan inrintawkna nasa tak ka neih phah thin a, mahse kan lo che hleithei lo a nih erawh chuan a hma aia tha zawka chet theih dan tur ka ngaihtuah thin a ni."
2. I thahrui a tul lovah hmang suh : Chawlh hahdam phawt a, a tha thei ang bera chet dan ngaihtuah tur.
"Inrinni chawhnua kan inkhelh dawn chuan zirtawpniah training zangkhai tak kan nei thin. Kan kete a khawng loh nan tiin training kan nei thin a, nasa takin kan ti ngai lo. Kan chakna thahrui chu a hun taka a zawng zawnga kan hman theihna turin kan khek thin.
"Training kan zawh veleh a rang thei ang bera mu turin ka inbuatsaih nghal a, darkar 9 atanga darkar 10 tal mut tlin ka tum thin. Ka inkhelh dan tur ngaihtuahin ka rilru sen vak vak ka duh ngai lo, field chhunga ka luh chiah hian harhvang takin ka luh theih phah thin a ni."
3. I taksa leh i rilru hahdam tir rawh : Mahni kalphung pangai zawm a tha
"Kei chu match kan neih dawn hi chuan darkar khat leh a chanvea hmaah ground ka thleng thin. Tu pawhin tihdan phung bik an nei vek a, player dangte chuan anmahni tiphur thei tur dance music leh rap music-te an ngaithla thin. Kei chuan chutiang chu ka ti ve ngai lova, minute 90 chhung thahrui ka neihna turin intur thate ka in a, ngaihtuahna fim tak nen cool takin hun ka hmang thin."
4. A hma thei ang berin harsatna siam sak tur : Enge i tih theih i khingpuite chu hmuh tir vat ang che
"Bul tan that hi a pawimawh hle. I ball tawh hmasak berah tihsual i neih loh chuan inrintawkna i nei bawk ang. A hma thei ang bera chance neih a pawimawh. A nih loh pawhin defender-te tibuai khawpa ball vawrh nghalte hi a tha.
"A chhan chu na taka defender-te kan nawr nghal chuan tihsual an nei ngei thin. Chungah chuan hremna kan pe chhunzawm tur a ni bawk."
5. Zahngaihna pek loh tur : A mala hneh tum tur
"Defender-te nen ball kan um kan um tur a ni, an chauh hun a thleng thin. Chung hunah chuan an thianten a puih loh chuan engmah an ti theilo thin. Defender a mala khalh fala, an chauh huna hremna pek chu ka khelh thin dan a ni."
6. Thinurna laka inven : Tawngkam mai mai engahmah ngaih loh tur
"Ka thin tihrim tum defender an tam thin hle, mahse an tawngkamte chu engahmah ka ngai ngai lo. An tawngkam avanga i thin a ur a nih chuan an thangah an awk che tihna a ni mai. Engmah ka sawi ngai lova, an duh duh danin lo tawng ve mai mai rawh se ka ti thin. Tawngkam ni lovin a khelhin kei chuan ka lantir mai thin.
"Defender thenkhat chuan min pet lui thin a, keimah min chang bik turte an indah thin bawk. Chu chuan min tibuai ngai lo, ka game ngai ka khel a, chu chu team-in a hlawkna a tel zawk thin a ni."