Manchester City manager Pep Guardiola chuan an defender Eric Garcia-a’n contract thar a ziah duh loh thu leh a chhuak duh nia a hriat thu a sawi.

Garcia hian City-ah kum khat dang bak contract a nei tawh lova, City hian contract thar zawrh mahse Spain U21 player hian a hnar.

Guardiola chuan hemi chungchang hi sawiin, “Kan hnenah contract thar a ziah duh tawh loh thu a sawia, kum khat dang la neiin, a pawh sei belh duh tawh lo. Keini chuan contract thar ziahpui kan duh a, mahse a man a duh loh avangin hmun danga khelh a duh niin ka hria,” a ti.

City hian defender thar Nathan Ake chu Bournemouth atangin pound maktaduai 41 sengin an lalut zo chiaha, hemi avang hian Garcia hian inkhelhna hmun a chang tam thei dawn lo nia inhriain, chhuah a thlang zawk niin chanchinbu thenkhat chuan an tarlang.

City hian tun Premier League season khelh zawh takah khan an title humhim zo lovin, Liverpool lakah an hloh a, season tharah erawh tha taka rawn kir an tum niin a langa, Ake bakah hian Valencia atangin Ferran Torres an lei fel tawh bawk.

City hian season thar atan an tlar hnung thawmthat chu an hna berah an dah niin sawi a ni a, season liamtaa an buaina ber leh indaih lohna ber pawh tlarhnung lam a ni.