23 Mar 2019 12:20

Inkhel

Mizo Sports Website hmasa ber

​Gaming khawvel la awptu tur Google Stadia?

PC Gaming, PlayStation, XBox leh Nintendo te chu kan hre lar hle, kan khelh ve mek an ni hlawm. Google chuan gaming lama zuan luh an tum a, tunah hian Stadia chhawpchhuak turin hma an la chho mek.

Computer to tak takin kan remkhawm a, Console to tak takin kan lei bawk a, Google chuan hetia gaming hardware to tak taka lei thin chu tihtawp an tum niin a lang. Computer, tablet leh mobile i neih chuan Google Stadia hi i khel ve thei dawn.

Cloud based gaming platform a ni dawn a, Google Chrome luh theihna khawl apiangah Stadia hi a khelh theih dawn niin a lang. Google chuan server lian tak neiin internet hmanga game khelh zung zung theihna an buatsaih ve mek. He ngaihtuahna hian gaming khawvel a her danglam ngei dawn niin a lang.

Game stream-na lar YouTube leh Twitch-ah hian gamer tam takin an game khelh lai an stream thin a, mipui tam takin an en thin. Fortnite leh PUBG te chu tunlai multiplayer game lar an ni a, Fortnite phei chuan nikum chhung khan Game stream atang ringawtin $2.4 billion lai a lalut hem mai. Game stream thin lar tak tak ho chuan thla khat chhungin $5,00,000 aia tam mah sum te an hui lut thin niin the Verge chuan a tarlang.

Heng te a nih avang hian Google chuan gaming lama sum siam chu thil pawimawh tak a ni tih an hrechiang a, internet khawvel an thunun hnuah gaming lam thunun tumin ke an pen mek a ni. Google Chrome browser-ah i lut anga, chuta tang chuan game i khel tawh mai dawn a, i duh leh youtube lamah i stream hem hem thei dawn bawk a. Game khelh laia eng eng emaw setting i khawih duh a nih pawhin tawngkam hmangin Google Assistant i thunun mawlh mawlh tawh dawn bawk a ni. PC-a hman theih gamepad tawh phawt chu Stadia hian a support dawn a, google hian a bik taka siam gamepad pawh lei theih turin an chhawpchhuak dawn bawk a ni.

Google hian Chrome, Chromecast leh Android khawl hmanga khelh theih turin Stadia hi dahchhuah an tum a, Apple lam software iOS leh Apple Safari mobile browser lam erawh an sawi tel lo tlat mai. Google hian Linux an hmang a, Doom game chu tharthawh leh an tum ruh hle. Tin, developers tam tak hip theih nan android an thlah zalen ang bawkin Stadia-ah hian developer tam takin thil thar tha tak tak an chhawp chhuah theih nan kawng an hawnsak leh dawn a. Gaming studio lian tak tak 100 aia tam mah an thawhpui tawh bawk.

Kumin chhungin tlangzarh hman an tum a, US, Canada, UK leh Europe-ah te tlangzarh phawt thum a ni. Hetia han ngaihtuah mai chuan idea tha tak chu a ni chiang mai, chutih laiin kum 5 lo la awmtur chhung hian Gaming khawvel a thunun thei angem? Tih chu zawhna lian tak a ni ta mek a. Gaming hardware to tak taka lei ngai dawn tawh lo mahse internet chak tha erawh a ngai dawn chiang. 1080p emaw 4K emawin a stream theih dawn a, 8K thlengin a theih dawn niin a lang bawk. Google hian Xbox One X aiin server nei tha zawk mahse 1080p resolution at 60 fps vela khelh dawn chuan internet bandwidth 25 Mbps vel tal a ngaih dawn hmel.

India ramah hian internet a chak vak lo niin kan sawi thin, a dik khawp mai. Chutih laiin Stadia khelh nan hetiang zat internet speed a ngaih dawn chuan khawvel ram changkang zawkte pawhin an huphurh thu an sawi nasa. Google hian video leh picture te compressed mahse internet chak lo atang chuan khelh a har dawn tho niin expert te chuan an sawi. Online multiplayer game khel thin chuan kan hria ang, a lag zauh pawi zia chu pawi thui tak a ni thin a nih kha.

Tin, internet a hek dawn em em bawk a, Netflix-ah hian HD-in movie darkar khat kan en chuan 2GB atanga 3GB emaw vel a ei hek thin. 4K vela game kan khelh chuan darkar khat lek chhungin 6GB chuang a kal dawr ngei ang le. Internet speed tha tak nei mah ila latency a that loh chuan chuti hlauh bawk. Mizoram chhungah Facebook a muan deuh laiin Youtube leh Google browser a chak em em si hi; a chhan chu India ramah Google data centre a awm vang a ni a.

Server mamawh thil reng rengah chuan, server hnaih aiin server hlata awm khawl reng rengah a muang zawk ziah. Entirnan Google data Centre hi Serchhipah awmin Stadia khel dawn ta ila, Aizawla awmte chuan Serchhip gamer kha i kap hlum hman lo zauh zauh ngei ang le. Chungte a nih avang chuan Stadia kalpui tum danah hian harsatna a la awm chho nawk dawn niin a lang tlat mai. Engpawhnise, thil thar, ngaihtuahna thar a ni a. Nakkin lawkah chuan hetiang hi kan la kalpui dan tur a ni tho tho niin a lang, thenkhat chuan Early Beta of the Future of Gaming an ti mek bawk a ni.