Changkannain a ken tel chu E-Sports a ni kan ti thei awm e, Game developer tha tak tak an rawn chhuak zawih zawih a, gamer tha tak tak leh followers ngah tak tak an rawn chhuak teuh bawk a. Gaming hi eizawn nan mi tam takin an hmang chho ta zel a.

Game developer tha tak pakhat chanchin tarlang ila. Game tha tak leh ropui tak siam tumin kum tam tak hun a seng, a game buatsaih chu Online Multiplayer Open World Game lam niin a free-a khelh theih turin a duang bawk a, a tlangzarh atanga kar khat lek chhungin 13 million chuangin an khel ta hem mai. A beisei phak baka nasain khawvel mipuiin an lawm ta.

Company lian tak a din chho nghal a, thla hnih khat lek an khelh hnuah erawh harsatna lian tak an tawk ta. A tira Bugs tifai tura a rawih a thian thate zingah amah ertu a lo awm ru reng mai chu niin. Chupa chuan code dang hmangin chu game ropui tak chu a tibuai tan ta a. Hackers an rawn pung ta hluai, game developer pawh tur ber nge a nih hriat theih lohvin tihbuai a ni chhunzawm bawk a. Tin, chu game chu a nawm hrim hrim avangin a zunah mipui an lo uai tawh laklawh si, a siamchhuaktupa erawh a lawm lo hle. "He game hi theihtawpa ka duan ni mahse tunah chuan tih tawp hmak ka duh, ka company pawh tihtawp nghal ka duh, a nih loh pawhin heti hian ka dah tawp anga, mipuiin an nin hunah game dangah an insuan anga, amahin a ral chhunzawm ve mai ang," a ti ta a.

Chutih lai chuan a fapa rawlthar kum 17 mi lek chuan, "Ka pa, kum khat emaw vel ka khel ve anga, siam that dan ka lo ngaihtuah dawn emni ni ang?" tiin a pa chu a dawr a. A pa chuan chutia a fapain a inhuam phawt chuan tiin a kutah a dah chhunzawm ta a. A fapa chuan game chu a khel chho ve tan ta a, hackers an tam tawh si, harsa a ti ve thin kher mai, chutih laiin a pa anga thluak tha a nih avangin engkim a man zung zung a, a thiam ber pawl a ni chho ta. Youtube leh Twitch vela a stream thin pawh entu a ngah thin hle, youtube lamah pawh subscribers nuai 200 chuang kum khat chhungin a nei ta hem mai.

Zan khat chu a game khel lai a live a, mi nuai chungin an en mek. Heti hian thu a sawi ta a, "Hei hi ka pa game siam a ni a, hackers ten nasa takin an lo pawngsual tawh a, game update thar hi kan mamawh hle tih ka hre chiang. A hma chuan 15 million chuangin he game hi kan khel thin, (inkhel.com) tunah chuan maintenance a that tawk loh vang leh program dik lo atam avangin gamers tam tak an inpuchhuak tawh a, 5 million chauhin kan khel ta. Hun rei tak ngaihtuahna ka lo seng tawh a, tunah chuan update thar rawn dah ka tum dawn a ni. Ni thum hnuah ka lo kir leh ang," tiin. A game khelh apianga hnehtu ni ziah thin kha chu thu a sawi zawh chuan a thi ta a.

A youtube channel pawh activity a awm lo, gamer dang amah ngaisangtuten activity a awm em? Tiin an lut zauh zauh reng, mahse hmuhtur a awm tawh lo. Ni thumni chu an nghak ta thap mai a, ni thumna zing a rawn ni a, a youtube channel live feed an dawng ta sap sap mai. Gamer ropui leh developer ropui a nih zia a rawn lantir. Update thar Version 2.0, 100MB pawh tling lo rawn dahchhuakin, Game-a bugs zawng zawng a clean vek bakah a hmaa an sawiselna zawng zawng, Server mumal lo leh Bandwidth/latency delay leh a dangte chu te a rawn siamtha vek a, respawn features thlengin chu update tharah chuan a awm tel ta vek a.

Update tharah chuan game developer company hming dik tak tarlan a ni ta bawk, game danga insuan tam tak pawh an lo lut thar leh a, a hmaa khel an tam ber lai let thawk khawpin an pung ta. Game tih tawp tawh mai tum ruk reng chu tunah chuan insiam thar lehin a hma aia ropui zawkin mipuiin an bawh ta a.

Chu game chu tuna i khelh lai mek kha a ni a, update patch rawn siamtu chu Isua a ni. Chu Update thar Version 2.0 chu chatuan nunna a ni a, update thar download chu nangma duhthlanna a ni, i duh chuan i download thei reng. He game khawvel, lei leh vana thuneihna zawng zawng pawh a PA-in a hnenah a hlan tawh bawk a ni.

- www.inkhel.com