Premier League match-ah a zawnin Manchester City an tlawm, ramchhung inelnaah phei chuan a zawnin Guardiola leh a hote vawi 3 lai an tlawm ta.

Premier league hmahruaitu City chu an dinhmun chhuhsak an ni a, Tottenham leh Arsenal ten khumin, City hian team hnihte hi point 2-in an phak lo mek.

Pathianni zan khan Emirates Stadium-ah Arsenal chuan si khat faiin Manchester City an hneh, an chak loh chungchangah Guardiola a thlaphang lem lo, game khelh tur a la tam thu a sawi chhuak.

"Ka player-te chungah ka lawm em em tho, an theihna zawng zawng an chhuah a, mahse hnehna kan chang lo a, an hnual tih ka hriatpui e.

"Premier League-ah hian a zawna vawi 4 champion thei an awm lo, statistics en hian thil theih loh a la ni rih. Mahse October thla chauh a la ni a, kan result tha lo hi kan hnuchhawn nghal a ngai ang.

"A umtu zawk hi kan vawi khat nihna a ni lo a nia, season hmasa phei kha chuan kan inthlau hman hle a nih kha. Season hi a rei a, inkhelh tur a la tam e," tiin Pep Guardiola chuan a sawi.

City hian an player pawimawh pahnih De Bruyne leh Rodri te an chhawr thei lo, Guardiola chuan an midfielder Rodri awm loh an tawrh thu a sawi bawk.

"Player tin te an pawimawh em em vek, mahse Rodri hi a pawimawh hle, season hmasa pawh khan chawlh a nei mang lo a nih kha.

"Carabao Cup-a kan chak loh chungchang kha chu a dang deuh a, hetih lai hian Premier League erawh ka ngaipawimawh a, a zawnin kan tlawm a, Rodri tel loa inkhelh dan tha tak kan ngaihtuah chhoh a ngai a ni," tiin Pep Guardiola chuan a sawi bawk.

Kovacic hnawhchhuah a nih loh chungchangah a ngaihdan zawh a ni a, Guardiola chuan hnawhchhuah tur chu nise an hnawtchhuak mai ang tiin a chhang a, inkhelh zawha buaina tenau chhuak pawh Arsenal lamin engkim an hriat thu leh, hemi chungchang erawh sawi ve a tum loh thu a sawi a ni.