Game 12 atanga goal 19 khung tawh Haaland

06th October 2022, 04:10PM

Norwegian striker Erling Haaland chu Manchester City a zawm hnuah a che tha chhunzawm zel a, Pep Guardiola team tan hian competition hrang hranga game 12 a khelh tawh atangin goal 19 ngawt a khung tling tawh.

Nilaini zanlai khan Champions League group G inkhelah Manchester City hian Danish Superliga champion lai FC Copenhagen an lo mikhual a, 5-0 laiin City hian an mikhual te hi an lo sawp.

Etihad Stadium inkhelah hian Haaland chuan first half chiah khel mah se, goal hnih a khung tho a, khel tluan se hat-trick a siam leh lovang tih a sawi theih loh.

He inkhelah hian City tan Haaland-a’n goal hnih a khung bakah hian Riyad Mahrez leh Julian Alavarez te chuan goal khat ve ve an thun bawk a, Copenhagen player Davit Khocholava chu a own-goal bawk a ni.

City hian an Champions League group stage game thum an khelh tawhah hnehna la chang vekin, Group G-ah pakhatna dinhmun an luah mek a, point 9 an hlawhchhuak tawh.

Premier League-ah pawh City hi an che tha a, tlawm la nei lo awmchhun niin, khelh 8-ah point 20 an nei a, pahnihnaah an awm mek a, point 1 chiahin league hmahruaitu Arsenal an phak lo.

City chet thatna kawngah Haaland a thawhhlawk hle a, kum 22 mi hian City tana a game khelh tawhah game khatah chiah goal khung loh a la nei a, a goal khung lohna inkhelah hian assist a nei thung.

Nipui bazar lai khan Borussia Dortmund atangin City hian Haaland hi an khulchhuak a, a manah a release clause euro maktaduai 60 an pe a, an tifuh cher cher hle.

Haaland hian City a zawm hnuah hat-trick vawi thum ngawt a siam tawh a, Sunday liamta mai pawh khan City hmelma lian Manchester United lakah hat-trick a siam.

Premier League-ah Haaland hian goal 14 ngawt a khung tawh a, game 10 khelh tlin hmaa Premier League goal 12 chuang nei thei hmasa ber a ni a, a zawna vawi thum Premier League home game-a hat-trick siam thei awmchhun a ni bawk.

Haaland hian Champions League-ah game 22 a khel tawh a, goal 28 lai khung tawhin, Champions League-ah hian Luis Suarez leh Rivaldo te ai pawhin goal a khung hnem tawh zawk a ni.

Copyright © inkhel.com 2022. All rights reserved.