Nikum November thlaa a khup a tih hliam hnuin Arsenal forward Gabriel Jesus chu a la chawl char char a. Tunah hian inkhel thei dinhmunah a ding leh tawh niin Football.London chuan a tarlang.

Tunah hian a dam tha tawh hle nia report a ni a, thlaleha international break neih hma ngeiin Arsenal squad-ah a lo kir leh hman rin a ni.

Arsenal hian tun kar chhungin Everton leh Bournemouth an hmachhawn dawn, Europa League lamah March ni 9 leh ni 17-ah Sporting CP an hmachhawn ang a. 

March thla chhungin Fulham leh Crystal Palace te Premier League match-ah an hmachhawn dawn. March ni 19-a Palace an hmachhawn zawh hian international break neih a ni dawn a, hemi hma hian Jesus chu a lo kir leh hman dawn nia report a ni.

Arsenal boss Arteta chuan, "Hma a sawn hle, a khup lamah pawh harsatna a neih kan hre tawh lo bawk.

"Rang taka lo kir leh turin kan duh a, mahse doctor te thurawn erawh kan ngaihpawimawh a ngai a ni," tiin Jesus-a chungchang a sawi.

Nipui bazar liamta khan Arsenal chuan Manchester City atangin £45m sengin Jesus an la lut. Arsenal tan Premier League game 14 a khel hman a, goal 5 khungin assist vawi 5 a nei hman.

World Cup atang khan chhawr theih a ni rih tawh lo a, hetih lai hian a hun takah a lo kir leh dawn niin a lang.

Champion tumin Arsenal hian theihtawp an chhuah mek, Premier League game 24 atangin point 57 an hlawhchhuak tawh a, pahnihna Manchester City aiin point 2-in an sang a, City hi game khatin an khel tam zawk bawk.

Arsenal hian game mawi tak takin khel thin mah se, goal khung harsat chang an nei ve thin. Tin, an key player thenkhat te pawh khelh chhiat chang an nei chho ve zel bawk a.

Season chawhnu lam a ni a, player te an thawkrim a, an chauh mek laiin fit takin Gabriel Jesus a lo kir leh dawn niin a lang a, hei hi Arsenal tan chuan player thar tha tak lei ang mai an ni dawn a ni.