Deontay Wilder chuan Tyson Fury nen sawi hlawh tak maia an inhnehtawk chu tha lo a tih thu sawiin, a chak zawk awm ngei tura inhnek that leh a duh thu a sawi.

American boxer Deontay Wilder chuan WBC title a kawl lai chu a humhim thei a. Wilder hian British boxer Fury chu vawi hnih a hnek tlu a, mahse heti chung hian mi tam zawkte chuan Fury chu chak zawk tura an ngaih thu an sawi a, an inhnehtawk chu mak an tih thu an sawi nasa hle a ni.

Mexican judge Alejandro Rochin chuan Wilder chu point a pe hnem zawk a, 115-111 a pe a, judge dang pakhat chuan Fury a chaktir a, judge pakhatin point inang a pe thung a, chak zawk an awm thei ta lo a ni.

Wilder leh Fury te inhneka a chak zawk zawk hi kum thar April thlaa Anthony Joshua hmachhawn thei tura beisei an ni a, mahse an inhnehtawk avang hian an inhnek that leh nge nge chu a ngaih hmel hle a ni.

Instagram lamah Deontay Wilder chuan, “Wilder vs Fury 2 hi ti leh vat ila ka ti khawp mai. Miin thil an sawi nasa si a, hemi tireh hmak tur hian inhnek tha leh thei ngei ila ka duh a ni,” a ti.

Round 12-naa Fury a hnek tluk khan referee khan a chhiar muang lui nia a ngaih thu sawi chhuakin Wilder chuan referee in Fury chu thawh lehna hun tha a siamsak nia a ngaih thu a sawi.

“Mi tam tak chuan referee khan a chhiar muang lui deuh nia an hriat thu te, a chhiar fan lui mah mah nia an hriat thu te an sawi hlawm a. Referee Jack Reiss kha referee tha em em mai a ni a, vawi tam tak chu kan lo inhrawn ve tawh a, a kaihhruaina hnuaia inhnek pawh a nuam viau thin a. Jack khan a hna tha takin a thawk a, mahse a tawpah chuan a entute khan thil chu an hre zawk mah a ni,” tiin Wilder chuan a sawi.