08 Jul 2019 11:41

bakteaJr.

Mizo tlangval

​Fury leh Wilder inhnek hun tur a hriat ta

Combat sports ngainatu zawng zawngte hmuh chak Tyson Fury leh Deontay Wilder-te inhnek chu a thleng leh dawn ta ngei a, a thlen hun tur hi British boxer rothap Fury chuan a sawi chiang.

Fury leh Wilder-te hi nakkum 2020 February thla ni 22-ah an innuai leh dawn a, boxing khawvel nghahhleh ber zinga mi a ni.

Kan hriat theuh angin Fury leh Wilder-te hi tunlai heavyweight boxer tha ber pahnih an ni a, hneh loh an la tawng lo ve ve. Nikum khan lo inhnek tawhin draw-a puan a ni a, mi tam tak chuan Fury kha a chak zawk ngeiin an hmu.

Fury hian thla hmasa mai khan German boxer Tom Schwarz chu awlsam takin a hneh a, hei hi nikum December thlaa Wilder a hnek hnua a fight hmasa leh ber a ni.

WBC heavyweight champion lai Wilder hian Fury hnuah Dominic Breazeale a hmachhawn leh tawha, KO hmangin a chak. Kumin hian Wilder hi Luis Ortiz hmachhawn tur a la ni a, hemi zawh hian Fury a hmachhawn leh dawn.

Fury chuan Wilder nena an rematch neih tur chungchang sawiin, “Kan rematch tur hi tih chian a ni tawh a, contract pawh kan ziak tawha, nakkum February ni 22-ah a ni ang. Rematch a thleng ngei tawh dawn a, ka knock-out hun tur a ni. A hma kha chuan boxing ka khel lo rei em a, kan rematch hunah erawh kum thum hnua rawn kir ka ni tawh dawn lova, zu lamah ka talbuai tawh lo bawk a ni,” a ti.