01 Dec 2018 03:44

inkhel

Fury ka knock out dawn: Wilder

Deontay Wilder leh Tyson Fury te chu an inhnek dawn ta a, Wilder hian a title chuhpuitu Fury chu knock out ngei a tum thu a sawi.

WBC heavyweight world title inchuh tur pahnihte hi Staples Center ah an inbuk fel vek tawh a, an inbuk tum hian boruak pawh a sosang teuh hle a. Wilder chuan inhnek vat vat a chak tawh thu sawiin, boxing ring chhungah chetziain thil tihchian a tum thu a sawi a ni.

American boxer Deontay Wilder chuan, “Thil sawi vak vak hi a ho a, awmzia a awm vak lo. Chu ai chuan boxing ring chhungah lut ila, chetziain engkim tih chian mai hi a fuh ber a. Ka vanglaia fight pawimawh ber a ni dawn a, mahse a hautak ber erawh a nih ka ring lo,” a ti.

“A hma pawhin Fury aia tawh khirh hi ka lo hmachhawn fo tawh a, Fury hi chu ka knock out ngei dawn a ni,” a ti bawk.

Wilder (40-0, 39 KOs) hi kum 33-a upa niin, a title a humhim hnuhnun ber chu kumin March thla khan a ni a, Luis Ortiz chu a hneh a ni.

British boxer Tyson Fury (27-0, 19 KOs) ve thung chu kum 30-a upa a ni a, 2015 khan Wladimir Klitschko chu a hneh a, hemi hnu hian kum hnih vel zet a chawlh hnuah kuminah boxing ring a luhchilh leh tan a, August thla khan Francesco Pianeta chu a hneh a ni.