Premier League club Fulham chuan RB Leipzig forward Timo Werner chu January thla-a thlasik bazar a inhawn hunah lakluh an tum dawn niin German leh English chanchinbu thenkhat chuan an tarlang.

Fulham manager Marco Silva chuan a tlarhma thawmthat a duh a, Werner hi Leipzig-ah a tlatlum lo chho nen Fulham hian hei hi remchanga lak an tum nia sawi a ni.

Leipzig chuan kum 27 mi hi an hralh phal niin a lang a, Leipzig director Rouven Schroder chuan Werner chu a chhuak duh a nih chuan dan an tum lo niin a lo sawi tawh.

Tun season-ah Werner hian inkhelhna hmun a chang thei meuh lova, Bundesliga-ah vawi hnih bak inkhel bul la tan lovin, Champions League-ah minute 30 bak a la khel lo bawk a, Leipzig chhuahsan a duh niin chanchinbu mite chuan an ziak nasa hle.

Tun season-ah Lois Openda leh Benjamin Sesko te a nekchhuah theih loh avangin, Werner-a hmalam hun a chiang lo hle a, inkhelhna hmun a chang lo zel a nih chuan January thla-a Leipzig a chhuahsan a rinawm chho hle a, thlasik bazar laia a chhuak lo a nih pawhin, nipuiah a chhuah ngei a rinawm.

Kum 2020 khan Werner hian Leipzig atangin Chelsea a zawm a, mahse Chelsea-a beisei a phak loh avangin, nikum nipui lai khan pound maktaduai 25 sengin Leipzig hian an lei let leh a ni.