Inrinni zan khan Stamford Bridge-ah Chelsea chuan Fulham an mikhual a, Blues chuan 2-0 in hnehna an chang a, kha match-a Fulham goal pawmsak lotu VAR duty Michael Salisbury chu hrem a ni.

First half minute 21-ah Fulham chuan counter attack an nei, King chuan goal a khung. VAR lam chuan referee Robert Jones hnenah halfwayline lama thil thleng enfiah turin thurawn a pe, Fulham goal a pawm lo tlat mai.

Halfwayline-ah Muniz chuan Chalobah a bum a, a ke a rah sak palh. Hei hi referee chuan foul hamna tlakah ngaiin, foul a ham ta a, Fulham goal a pawmsak ta lo a ni.

Kha thutlukna khan sawisel a hlawh hle. VAR duty Salisbury chu a bul tumtu a ni a, foul pawh kha a nihna takah chuan football-a thil thleng pangngai a ni a, goal pawmsak lohna tur atan chuan a nep mah mah a ni.

Salisbury hi Pathianni zana Liverpool leh Arsenal inkhelah VAR lama duty tur a nih leh laiin, Professional Game Match Officials Limited (PGMOL) chuan a hna an chawlh lailawktir ta a ni.

PGMOL chief Howard Webb chuan Fulham lam a be pawp a, ngaihdam a dil niin The Athletic chuan a tarlang. Kha match-ah khan Joao Pedro chuan a tauh goal a, Enzo Fernandez chuan penalty atangin a chhuih goal bawk a, si hnih faiin Chelsea an chak a ni.