Kar tawp Dutch league inkhelah hmahruaitu Ajax chuan league table hnuai ber dawttua awm Excelsior an mikhuala, Ajax hi 6-2 laiin an chak.

He inkhelah hian Ajax striker kum 35 mi, Real Madrid tan pawha lo khel tawh Klaas-Jan Huntelaar chua hattrick a siam a, Ajax chanchina hattrick siam thei upa ber a ni. Huntelaar bakah Southamton player hlui Dusan Tadic chuan Ajax tan goal hnih a khunga, Kasper Dolberg chuan goal khat a khung bawk. Excelsior tan hian Mounir El Hamdaoui leh Jeffry Fortes-te chuan goal khat ve ve an khung ve bawk.

He inkhela thil langsar tak pakhat thleng erawh thil duhawm loh a ni a, Ajax midfielder Frenkie de Jong a tha a tihnat avangin inkhel zo thei lovin lakchhuah a ni. Ajax tan De Jong hi a pawimawh em em a, a khelh that thin em avangin tunah hian Barcelona chuan man to tak an lei fel tawh a, nipui atangin Barcelona player a ni dawn.

Ajax hi Champions League Quarter-final second leg khel turin an inbuatsaih mek a, first-leg ah Juventus chu Johan Cruyff Arena-a 1-1 in an lo inhnehtawkpui tawh a, Turin-a second leg an khelh hunah hnehna chan ngei an tum a, chumi tur chuan De Jong an mamawh hle.

Juventus hmachhawn turin De Jong hi a dam hman dawn em a hriat lova, a dam hman lo a nih chuan chawpchilh takin Ajax hi an insiamrem a ngai dawn.

Ajax hi tunah hian hmahruaitu an ni meka, an hnuai chiaha awm PSV aiin point thumin an sang zawk a, mahse khelh khatin an khel tam zawk. PSV hi an khelh hmabakah chak mahse Ajax goal difference a san em avangin Ajax hi hmahruaitu an ni dawn tho a ni.