09 Jun 2019 10:19

inkhel

French Open title vawi 12 la thei Rafael Nadal

Rafael Nadal chuan final-ah Dominic Thiem hnehin, French Open men’s singles title vawi 12 a la ta a. Tennis player zingah chuan Grand Slam tournament pakhata vawi 12 champion thei hmasa ber a ni.

‘King of Clay’ Nadal hian 6-3, 5-7, 6-1, 6-1 in Dominic Thiem hi a hneh a, Grand Slam title 18 a lakna niin, Roger Federer (20) a tluk pha tep tawh a, World No. 1 Novak Djokovic aiin pathumin a la hnem tawh bawk a ni.

Tun hnaiah Thiem hi a inkhelh zawn hnem em avangin final-ah hian a chet that theih an ring lo hlawm hle a, mahse chutiang chu a ni mai bik lo. Set khatna an khel a, Austrian star hi chau awm pawhin a lang bik lo a; amaherawhchu, set khatnaah hian Nadal chu minute 53 chhungin 6-3 in a chak a ni.

Set hnihna an khel leh a, Thiem chuan hma a sawn chho hle a. Mi thenkhat chu set khatnaa Nadal aia an chet chhiat tawh chuan an hnual fo a, Thiem erawh chuan chuti maia inpek a tum bik lo a, a tawpah set hihna chu 7-5 in a la zui ve leh a. Thiem hi kum 30 hnuailam la inkhel thin zingah chuan Grand Slam final-a set la thei awm chhun a ni.

Court Philippe-Chatrier chhungah thawm a ring hle a, Thiem chu a rawn che tha chho tan dawn nia ngaihna a lian a, mipui pawh an phur viau a. Hetih lai hian set thumna an khelh leh tan atangin Nadal chu a che fuh lehzual hle a, 3-0 in hma a hruai nghal der mai a. A tawpah set thumna chu Nadal hian 6-1 in a la thei a ni.

Set lina an khel leh a, Thiem chu a hma angin a che thei lo tial tial a, Nadal erawh a zuih mai lo hle a, set lina pawh chu a hma chiaha a chakna ang chiah, 6-1 bawkin a la zui leh a. Darkar thum vel an inkhelhah hian Rafael Nadal chu 6-3, 5-7, 6-1, 6-1 a chakin, 2019 French Open champion a ni thei ta a ni.

Kum 33-a upa Nadal-a’n Grand Slam title 18 a lak zinga 12 chu La Coupe des Mousquetaires (The Musketeers’ Trophy) hi niin, kum 46 chhung zet record lo awm tawh chu a khum a. Margaret Court chu Australian Open-ah vawi 11 a champion thei a, Grand Slam tournament pakhata champion hnem ber record chu hun rei tak a lo chelh tawh a. He record hi tunah chuan Nadal hian a khum thei ta a ni.

A chak ta lo zawk, kum 25-a upa Dominic Thiem hi Grand Slam final-ah vawi hnih a tlawmna a ni ta a, nikum French Open final-ah anni pahnih bawk hi an lo inhmachhawn tawh a, hetah hian Nadal chu set thumah a chak a ni.