French Open semi final-ah Nadal leh Del Potro

08th June 2018, 02:06AM

Juan Martin del Potro chuan 2009 hnua a vawi khatna atan French Open semi final a thleng a, helai hmuna semi final lut ngun ber Rafael Nadal nen an inhmachhawn ang.

5th seed Del Potro chu 3rd seed Marin Cilic nen quarter final-ah an inkhel a, inhliam vanga buai ngun deuh mai Del Potro hi 7-6 (5), 5-7, 6-3, 7-5 in a chak a, semi final a lut a. Inkhel dangah vawi 10 ngawt mai Roland Garros champion lo ni tawh Rafael Nadal chu Diego Schwartzman nen an inkhel a, Nadal hian set khat a hloh zet a, a tawpah 4-6, 6-3, 6-2, 6-2 in a chak a, semi final a lut ta bawk a ni.

Kuminah Roland Garros-a che tha tak Del Potro chu semi final a luh avang hian kum li chhunga a vawi khatna atan ranking top 4-ah a lang ve leh thei dawn a. An inkhelh zawh chiah hian Court Suzanne Lenglen a inkhel entute chuan a lawmpuina atan an au ring hle.

2009 French Open semi final-ah Del Potro hian Roger Federer a lo hmachhawn tawh a, hemi tum hian a tlawm zawkah a tang nghe nghe a. Cilic lakah hian winner 31 a nei a, ace 19 a nei bawk a. Set hnihna tawp dawnah inkhel entu pakhat vangin a thin a rim a, set hi a hloh hial a, mahse a tawpah chuan a chak ta tho a ni.

Rafael Nadal te inkhelah hian set khatna chu Diego Schwartzman chuan a la a, inkhelh lai hian ruah a sur avangin an chawl lailawk a. Ruah sur zawhah inkhel an chhunzawm a, Nadal chuan a thiam zawk a nihna a lantir a, Schwartzman hi a chak ta lo a ni.

Nadal hian French Open semi final hi vawi 11 ngawt mai a thleng ta a, mipa zingah chuan Grand Slam pakhata hetiang zat semi final thleng thei pathumna niin, a hmain Roger Federer leh Jimmy Connors te chuan hetiang zat hi semi final an lo lut tawh a ni.

Semi final-ah Juan Martin del Potro leh Rafael Nadal te chu an inkhel dawn a, anni pahnih hi a hmain vawi 14 an lo inkhel tawh a, hengah hian Del Potro hi vawi 5 a chak ve tawh a, Nadal hi vawi 9 a chak tawh a ni.


Copyright © inkhel.com 2024. All rights reserved.