Tennis khawvela thil thleng nghahhlelhawm ber pawl chu hmuh tur a awm leh dawn ta a, French Open semi final-ah milian pahnih Roger Federer leh Rafael Nadal te chu an inhmachhawn dawn a. Zirtawpni hian a vawi 39-na atan tennis mihrang pahnihte hi an inkhel ang.
Roger Federer chuan French Open bikah Rafael Nadal hneh dan a la ngaihtuah chhuak chiah lo niin an sawi thin a, tun tumah chuan beiseina sang tak a nei thar a, final luh theih ngei a inbeisei niin an sawi.
Swiss star Federer hi Roland Garros-ah Mallorcan lakah hian vawi nga a lo tlawm tawh a, vawi li chu final-ah niin, vawi khat dang leh chu 2005 semi final-ah khan a ni a. 2005 kumah hian rawlthar Nadal chuan French Open title hi a la zui a, Parisian clay-a title 11 a lakna kawnga a hmasa ber a ni.
Rafael Nadal leh Roger Federer te clay court-a an inkhelh tuma Federer a chak theih hnuhnun ber tum chu 2009 khan niin, Madrid khawpuiah Spaniard chu a tlawm zawkah a tang a. Hemi tum loah hian clay court-ah chuan Federer hi vawi khat dang chu a chak ve tawh bawk a ni.
2015 hnuah kumin hi French Open bika Federer chet that ve ber tum a la ni a, semi final thleng tur hian hun harsa em em a tawng miah lo a. 2009 champion hi a tir round li chhung chu awlsam takin a chak chho a, set a hloh miah lo a. Stanislas Wawrinka chiah chu tlema hmachhawn khirh deuh a tawn a ni mai.
Clay court lalpa tia an sawi thin Rafael Nadal chuan a kut veilam hmangin Federer chu a hneh leh theih a rinawm viau a, Roland Garros-ah hian a topspin tha em em vangin Federer chuan a ngam lo fo tawh a. Anni pahnih hian French Open-ah set nga an la khel tling ngai miah lo a ni.
Nadal leh Federer te hi a hmain vawi 38 an lo intawng tawh a, hengah hian Nadal chu vawi 23 a chak tawh a, Federer chu vawi 15 a chak ve tawh bawk a. Grand Slam bikah chuan Nadal hi vawi 8 chak tawhin Federer chu vawi 3 a chak ve tawh a, Roland Garros-ah chuan vawi 5 an inkhelh tawhah Nadal hlir a la chak a ni.
French Open bika an lo inkhelh tawh dan hi han thlir let ila.
2005 semi final - Nadal chuan 6-3, 4-6, 6-4, 6-3 in Federer a hneh.
Kum 19-a upa Nadal chuan Roland Garros-ah thawm a nei lian hle a, top seed Federer chu semi final-ah a hneh a, final-ah Argentine player Mariano Puerta chu a hneh zui a ni.
2006 final - Nadal chuan 1-6, 6-1, 6-4, 7-6 (7/4) in Federer a hneh.
Federer chuan 1969-a Rod Laver hnua a ruala Grand Slam title pali kawl vek theih a tum hle a, hei hi Nadal chuan a lo dang thei a, clay court-a a that zia a lan chhuahtir chiang hle.
2007 final - Nadal chuan 6-3, 4-6, 6-3, 6-4 in Federer a hneh.
Paris khawpuiah a hma kum ang bawkin Nadal chuan Federer chu set li-ah a hneh a. He tournament tan dawn hian Federer chu World No. 1 niin Nadal chu 2nd seed a ni a. Player naupang zawk Nadal chuan a zawnin French Open title chu kum thum chhung a la ta chiah a ni.
2008 final - Nadal chuan 6-1, 6-3, 6-0 in Federer a hneh.
Court Philippe Chatrier ah tennis khawvel mak tih khawpin Nadal a che ropui a. Set thumah Nadal chuan Federer a hneh thei a, Swiss star chak loh chian ber tum a la ni nghe nghe a. Open era-ah chuan Nadal chu set hloh miah loa French Open title la thei pathumna a ni.
2011 final - Nadal chuan 7-5, 7-6 (7/3), 5-7, 6-1 in Federer a hneh.
French Open bika an inkhelh tawk ber tumah Nadal chu a chak zawk a ni leh ta tho a. 2009 khan Nadal chuan mak tak maiin Robin Soderling a hneh lo a, hemi kumah hian Federer chuan French Open title hi a la a, a dang chu a lak belh thei ta lo a ni.
RAFAEL NADAL
Age: 33
Height: 185cm
Weight: 85kg
Plays: left-handed (two-handed backhand)
Ranking: 2
Career prize money: $106,957,186 ($A153.30 million)
Career titles: 81
Career win-loss record: 949-195
Grand slam titles: 17
French Open win-loss record: 91-2
Best French Open results: champion 2005, 2006, 2007, 2008, 2010, 2001, 2012, 2013, 2014, 2017, 2018
ROGER FEDERER
Age: 37
Height: 185cm
Weight: 85kg
Plays: right-handed
Ranking: 3
Career prize money: $123,632,204 ($A177.20 million)
Career titles: 101
Career win-loss record: 1208-263
Grand slam titles: 20
French Open win-loss record: 70-16
Best French Open results: champion 2009; runner-up 2006, 2007, 2008, 2011