05 Jun 2019 01:00

bakteaJr.

Mizo tlangval

​French Open: Nadal vs Federer kan hmu dawn

French Open khelh mekah, mipui hmuh chak ber pakhat a thleng dawn a, Rafael Nadal leh Roger Federer-te chu semi-final ah an inhmachhawn dawn.

Roger Federer hian Swiss player bawk Stan Wawrinka chu quarter-final ah 7-6 (7-4), 4-6, 7-6 (7-5), 6-4 in a hneha, hemi hma deuh lawk hian Nadal chuan quarter-final ah Kei Nishikori chu 6-1, 6-1, 6-3 in a hneh ve bawk avangin Nadal leh Federer-te hi semi-final-ah an intum dawn.

Nadal leh Federer-te hi tennis chanchina player ropui ber pahnih an ni a, an intum dawn hi chuan sawi a hlawh nghal lo ngai lo. Tun tumah pawh an inhmachhawn dawn a, mi tam tak chuan final-a inhmachhawn tura an duhte an nih pawh a rinawm. Heng tennis player ropui pahnih te hi Grand Slam la hnem ber pahnih an ni a, an pahniha Grand Slam an lak tawh zat belhkhawm hi 37 lai a ni.

Kum 33 mi Nadal hi Roland Garros-ah vawi 11 lai semi final a lut tawh a, heng zawng zawngah a la champion vek a, tun hi semi final a luh vawi 12 –na a ni. Federer hi kum li hnuah a vawi khatna nan Roland Garros a khel a, ‘Clay Lalpa’ an tih Nadal hi a paltlang a nih chuan a champion zui lovang tih a sawi theih loh.

Grand Slam vawi 17 la tawh Nadal hi French Open-ah tu mahin an tluk meuh lova, vawi 11 champion tawhin, ani aia French Open-a champion hnem an awm lo. Nadal hi tunah pawh French Open champion lai a ni a, clay-court a a that em avangin champion tura rinkai ber pawh a ni.

Kum 37 mi Grand Slam 20 la tawh Federer erawh hian French Open hi vawi khat bak a la la lova, a champion chhun hi kum 10 kalta daih tawh kha a ni.

Nadal leh Federer te hi an intum fo tawh a, head-to-head ah Nadal hian 23-15 in hma a hruaia, mahse an inhmachhawn hnuhnung pangaah Federer hi a la chak vek thung a ni.