Kumin French Open lawmman chu an tipung nasa dawn a, lawmman zawng zawng belh khawm hi € 39.20 ($45.73 million) zet a ni dawn a, Australian Open leh Wimbledon te aiin sum a tam tawh dawn a ni.
Swiss superstar Roger Federer chuan a hmain Grand Slam sum tipung tura thuneitute nawr reng mai chu ninawm a tih thu a lo sawi tawh a, tun hnaiah Fédération Française de Tennis (French Tennis Federation) chuan French Open lawmman tihpun hi a titlu ta a. An tihpunna hi a hma aiin 8% in a sang tawh zawk a, Grand Slam lawmmanah chuan a sang ber a ni dawn a. Amaherawhchu, kuminah US Open lawmman chu tihpun an tum ve bawk a, heti a nih chuan French Open lawmman hi a la rawn khum hmel hle.
Kuminah chuan 5th round a chak lo te chuan €40,000 an hawn ang a, a hma aiin 14.3% ngawtin a tam zawk a. Mipa leh hmeichhe champion te chuan €2.2 million ve ve an dawng dawn a, a hma aiin 5% velin a pung a ni.
French Tennis Federation (FFT) chuan tun hnaiah sum an hman chhuah nasat em avangin lawmman tihpun pawh hi thil harsa tak a nih rih thu an sawi a, tun aia tam zawka tihpun duh mah se tih ngaihna a awm rih lo niin an sawi.
Roland Garros chu an khawih tha nasa hle a, centre court thar an siam bakah a chung khuh theihin an siam thar bawk a, heng thilah hian €400 million bawr vel chu an hman hmel a. FFT chief Bernard Giudicelli chuan, “Roland Garros chei thatna atan hian pawisa kan puk teuh a, leiba kan ngah ve hle mai a. Lawmman pawh hi a nazawngin kan tipung thei dawn lo a, champion leh first round-a chak lo te lawmman lak inthlau lutuk tiziaawm hmasatu kan ni thei hi lawmawm kan ti a. Grand Slam dang pawhin min rawn entawn ve zel a, hei hian min tilawm a ni,” a ti.
Grand Slam kheltute chauh an inel lo a, a buatsaihtute karah inelna mai bakah inerna a nasa em em a. Entu mipui tam zawngah te, court chung khuh theih a nih leh nih loh thuhlaah te, television rating lampangah te thlengin an inel nasa a. Heng zawng aia boruak tisangtu chu lawmman dawn tur pawisa zatah a ni.
Roland Garros hi Grand Slam neihna hmun pali zingah chuan a te ber a ni a, hei vang hian entu mipui pawh a dangte ang zat a ni thei lo thin a. Entu an tlem miau avangin pawisa lut pawh a elpuite aiin a tlem bik zel a, hun rei tak ruahmanna an lo siam tawh, tih len belh zel chu an la puitlin thei meuh rih lo.
2015 khan US Open chuan Wimbledon khumin Flushing Meadows chu Grand Slam event zinga sum tamna ber a ni a, French Open chu palina a ni a. 2016 khan Britain in European Union chhuahsan an tih hnuah British Pound a tlahniam vak a, hei vang hian Wimbledon sum pawh a nghawng a, 12% zetin a tlakhniam phah a. Kum hnih hnuah pawh Wimbledon hi French Open aiin a la hniam a ni.
Kuminah Australian Open lawmman chu 10% in a pung a, A$55 million ($41.50 million) a ni a, Grand Slam upa ber Wimbledon lawmman chu 2018 atan £34 million ($45.27 million) a ni a, nikum aiin 7.6% in a sang zawk a ni.
August thlaa khelh tur, kumin chhunga Grand Slam hnuhnung ber US Open chuan nikum aia lawmman sang zawk sem chhuah an tum bawk a, a zat chiah hi an la tichiang lo a. Nikum khan tennis tournament zinga lawmman $50 million sem tling hmasa ber an ni a, a hma aiin an lawmman hi 9% in a pung a. Kuminah a la pun belh leh dawn a ni.