​French Open khel lo tur Sharapova

16th May 2019, 03:05PM

World no.1 hlui Russian tennis player Maria Sharapova chu a dar (shoulder) hliam a la dam theih loh avangin French Open a khel thei dawn lova, a inhnukdawk.

Sharapova hi a inkhelh hnuhnun ber chu kumin kum tir January thlaa St Petersburg Open daih tawh kha a ni a, February thla khan a darah zai tenau a neih thu sawiin, kar hnih hnu vela dam leh mai tur a nih thu a sawi a, Miami Open-a tel a tum thu pawh a lo sawi tawh.

Mahse beisei angin thil a awm lova, a dar hi dam chuang hleithei lovin Miami Open bakah Porche Tennis Grand Prix leh Italian Open atang te pawhin a lo inhnukdawk tawh a, tunah tun thla tawp atanga khelh tan tur; vawi hnih a lo champion tawhna French Open atang pawhin a inhnukdawk leh ta a ni.

Vawiin mai khan kum 32 mi Sharapova chuan instagram lama a account-ah French Open a khelh lo tur sawi chhuakin, “Vawiin hian French Open lo awm tur atan kan inhnukdawka, a chan chuan thutlukna dik tak siam hi thil awlsam a ni ngai lo. Chanchintha lamah erawh practice ka nei tan leh thei tawh a, ka dar pawhin dam lam a pan mek zel. Paris ka ngai em em che nakkumah kan inhmu dawn nia,” a ti a ni.

Sharapova hian Grand Slam title panga lai a la tawh a, tum nga lai world no.1 nihna a lo hauh tawh bawk. A darah hian hliam a nei fova, tun hi a vawi khatna a ni lo. A dar hliam thin avang hian eng emaw chenah a nih tur ang a ni lo pha lo pawh a tih theih a, tunah hian world ranking-ah 35-na a ni mek a ni.

Copyright © inkhel.com 2024. All rights reserved.