2015 French Open khelh mek chu a hmawr an bawk chho zel a, hmeichhe singles lamah Ana Ivanovic leh Lucie Safarova-te chuan quarter-final-ah an tumpuite ve ve hnehin semi-final an lut.

Seventh-seed Ana Ivanovic hian quarter-final paltlang turin Elina Svitolina chu 6-3 6-2 in a hneh a, kum 2008 khan he intihsiaknaah hian Serbian star hi a champion.

Lucie Safarova thung hi chuan semi-final lut turin Garbine Muguruza 7-6 (7-3) 6-3 in a hneh a, Ivanovic nen hian final luh inchuhin semi-final-ah hian an in hmachhawn ang.

Safarova hian quarter-final lut turin Thawhtanni khan fourth round-ah champion lai Maria Sharapova a hneh a, Ivanovic tan hian a zuamawm hauh lo ang.