Rafael Nadal chuan Roger Federer laka chungnung zawk a nih zia a lantir a, French Open semi final-ah Spaniard chu 6-3, 6-4, 6-2 in a chak a, final a lut.

Tennis khawvela player langsar pahnihte hi a hmain vawi 38 an inkhel tawh a, hengah hian Nadal chu chungnung zawkin vawi 23 a chak tawh a, Federer chu vawi 15 a chak ve tawh bawk a. Tun tuma a chak leh tak avang hian an pahniha vawi 39 an inkhelhah Nadal chu vawi 24 a chak tling ta chiah a ni.

Clay court lalpa tia sawi Nadal chuan a hmain Roland Garros title vawi 11 a la tawh a, kuminah title vawi 12-na lak theih a tum hle a, chutiang hun chu a thleng teuh ta viau bawk a ni.

An inkhelh tan tirh atangin rin lawk ang deuhin Nadal chu a che tha nghal hle a, a hmaa an lo inhmachhawn tawhah clay court bikah phei chuan Federer hi vawi hnih chiah a la chak ve thei a, hei vang hian beisei san theih a ni lo hle a. Nadal hi clay court bikah chuan vawi 13 a chak tawh a, Roland Garros-ah phei chuan vawi 5 an intawn tawhah Nadal hlir a la chak a, tun tum hi vawi 6 an intawnna a ni.

Semi final-ah hian Nadal chuan break point vawi khat chu a veng thei a, hemi zarah hian World No. 2 hian inrintawkna a neih nasat phah sauh bawk a. Federer chu a tir lam atangin a tal buai titih deuh fo a, a groundstroke timing chu a ti dik hleithei meuh lo a ni ber mai.

Rafael Nadal chuan set khatna chu minute 51 chhungin 6-3 in a la a. Set hnihnaah chuan Federer chuan 2-0 in hma a hruai zet a, a hnu deuhah Nadal chuan tan a la chho a, set hnihna hi minute 50 chhung an khel a, a tawpah Nadal chuan set hi 6-4 in a la leh a ni.

Set thumnaah pawh chanchin a danglam chuang lo a, Nadal chu 6-2 in a chak leh a, a tawpah Rafael Nadal hi 6-3, 6-4, 6-2 a chakin kumin French Open final-ah Novak Djokovic leh Dominic Thiem te inkhela chak zawk zawk nen an inhmachhawn dawn a ni.