French Open-a vawi thum champion tawh Serena Williams chu French Open khelh mekah unseeded Sofia Kenin lakah a tlawma, a tla.

Seeded no 10 Williams hi kum 20 mi Kenin lakah hian 6-2, 7-5 in a tlawma, French Open-a a zinkawng a tawp ta rih a ni.

Williams hian hmeichhe zinga Grand Slam la hnem ber Margaret Court-i record dinglai chu a nih rualpui teuh tawh viau a, pakhata la pha lovin, a la nghah leh deuh rih a ngai dawn. Williams hian Grand Slam 23 a la tawh a, Court-i hian 24 pali a la tawh.

Williams-i hnehtu Kenin hi hnehna a chan hnu hian a tapa, Kenin chuan, “Williams lakah hnehna ka chang thei hi ka lawm hle a, tuna ka tah atang ringawt pawh hian ka lawm zia in hmuh ka ring. Serena khelhpui hi chuan point zawng zawng hi a suala sual chhuah a ngai tak meuh meuh a ni,” a ti.

Williams-i tlak hma deuh lawk hian hmeichhe world no.1 Naomi Osaka pawh a lo tla tawh a, French Open-ah hian hmeichhe top 10 zinga pathum chiah an bang tawh.

French Open champion lai Simona Halep erawh a la tlang zela, Lesia Tsurenko chu 6-2 , 6-1 a hnehin round of 16 a lut.

Williams hnehtu Kenin hian fourth round-ah Australian seeded no.8 Ashleigh Barty a tum dawn a, Halep hian kum 18 mi, a vawi khat nana French Open-a inlan Iga Swiatek a hmachhawn ve bawk ang.