Serena Williams chuan set a hloh phawt a, a khingpui Ashleigh Barty chu hnehin French Open third round a lut.

Vawi 23 ngawt mai Grand Slam title lo la tawh Serena leh 17th seed Ashleigh Barty te inkhelah hian Ashleigh hian set hmasa ber chu 6-3 in a la a, mahse Serena hian tan a la chho a, a hnu set hnih chu a rawn la a, a tawpah 3-6, 6-3, 6-4 a chakin third round a lut ta a ni.

A hnua a sawi leh danin Serena chuan, “Set hmasa berah ka chak lo a, ka rilruin a aia tan lehzual a ngai ka ti a. Theihtawp ka chhuah a, a tawpah chuan a chak zawk ka ni ve leh thei ta hlauh a ni,” a ti.

World No. 1 thin Serena hian 11th seed Julia Goerges chu a hmachhawn leh dawn a. Serena hmachhawn tur German star hian French Open quarter finalist lo ni tawh, Belgium star Alison van Uytvanck chu 7-5, 7-6 (7-5) in a hneh a ni.

Kum 36-a upa Serena Williams hian first round-ah Kristyna Pliskova chu a hneh a, Grand Slam-ah vawi 317 a chakna a ni a. A chak chho zel a nih chuan quarter final-ah Maria Sharapova nen an inkhel thei dawn a ni.

British No. 2 Heather Watson chuan Roland Garros third round a thlen theih miah loh chu a la thlak danglam thei chuang lo a, Heather hi 16th seed Elise Martins lakah 6-3, 6-4 in a chak lo a. Kum 26-a upa Watson hi tun hnai kum 8 chhungin second round-ah vawi 6 a tlawm ta a ni.