27 May 2015 07:24

digimalt

​French Open-ah player langsarte chak hlawm

2015 French Open tan a ni a, player langsar ten an khingpuite an hneh chho mek. Hmeichhe lamah top seed Sarena Williams chuan a ni thum naah Andrea Hlavackova chu 6-2 6-3 a hnehin round two a lut a, hetih lai hian nikuma semi-finalist Eugenie Bouchard erawh a chak lo hlauh. Bouchard hian 6-4 6-4 in Kristina Mladenovic a hneh lo a ni.

Mipa lamah champion lai Rafael Nadal leh World number one Novak Djokovic chuan an khingpuite an hneh ve ve a, Champion lai Nadal hian darkar khat leh minute 50 chhungin world No 296 Quentin Halys a hneh. Nadal hian Roland Garros-ah hian vawi 67 hnehna a chang ta a, kum 6 liamta khan Robin Soderling a hneh lo tawh a, kha kha Roland Garros-a a chak loh chhun a ni.

Champion rinkai ber Novak Djokovic chuan 6-2 7-5 6-2 in Jarkko Nieminen a hneh a, Nadal leh Novak te hi quarter final-ah an chak chhoh zel chuan an insu thei dawn niin a lang. Seventh seed David Ferrer pawhin 6-1 6-3 6-1 in Lukas Lacko a hneh a, Ferrer hian clay court-ah vawi 300 hnehna a chang ta a ni. Hmeichhe lama 4th seed Petra Kvitova a him hram a, New Zealand mi Marina Erakovic lakah Petra hi 6-4 3-6 6-4 in a chak hram a ni.