18 Sep 2020 08:54

bakteaJr.

Mizo tlangval

French Open-ah Osaka kan hmu dawn lo

US Open-a champion zo hlim, Japanese tennis player Naomi Osaka chu French Open khelh turah a inlan dawn lova, a inhliam avangin a inhnukdawk.

Osaka hi US Open hma chiaha khelh Cincy Masters final atang pawhin a lo inhnukdawk tawha, a inhnuhdawh chhan hi hamstring injury vang a nih thu a sawi.

French Open hi tun thla tawp September ni 27 atanga khelh tur a ni a, Osaka hi khel tura ngaih ni mahse rinlawk loh takin a inhnuhdawh a ngai ta a ni.

Kum 22 mi Osaka chuan French Open a khelh loh tur chungchangah thuchhuah siamin, “French Open-ah ka inlan thei dawn lova, ka hamstring hi a la dam loh avangin clay-a khel turin inpuahchahna hun ka nei thei dawn lo. Ka tan chuan heng tournament pahnihte hi an inhnaih mah mah a ni,” a ti.

US Open final-a Victoria Azarenka a hneh tum pawh khan Osaka hian a hamstring veilam hi a tuam tawha, mahse 1-6, 6-3, 6-3 in a chak ta tho.

World no.3 ni lai, Grand Slam title pathum la tawh Osaka hian French Open-ah hian round thumna a la pel ngai lo a ni.