French Open 2019 lawmman a pung

21st May 2019, 01:05AM

French Open 2019 buatsaihtute chuan lawmman dawn theih chu nikum aiin an tihpun belh a, a hmaa lawmman zawng zawng €39 million (£34.2 million) ni thin kha kuminah chuan €42 million (£37.4 million) a ni tawh dawn.

Rafael Nadal chuan Roland Garros title lak theih ngei a tum hle a, a champion thei a nih chuan French Open mipa singles trophy La Coupe des Mousquetaires vawi 11 a lakna a ni ang a, a aia champion hnem an awm loh bakah a lawmman dawn theih chu €2,300,000 (£2.01 million) a ni thei ang.

Simona Halep chu hmeichhe lama French Open title kawl mektu a ni a, nikum final-ah khan Sloane Stephens chu a hneh a, Grand Slam title a lak hmasak ber a ni nghe nghe a. Kuminah a title kawl lai hi a humhim thei a nih chuan a hma aia €2.29 million (£2.01 million) a hausain Paris khawpui chu a chhuahsan thei dawn a ni.

Kumin atangin final-a chak ta lo mipa leh hmeichhiate chuan €1.03 million (£1.17 million) ve ve an dawng dawn a. Semi final-a chak ta lote pawhin €587,565 (£515,512) an dawng dawn bawk a ni.

Round tina sum dawn theih pawh kum dang aiin a pung vek hlawm a, first round-a tla te chuan €46,000 (£40,191) zel an dawng ang a, nikum lama an dawn aiin €6,000 in a pung chho a. Round hniam lama an sum dawn aia tam hi US Open-ah chiah an pe a ni.

Roland Garros chuan first round-a tlate sum dawn tur hi tipung mahse round sang lampangah chuan tournament lian zinga pawisa dawn hnemna pawl a ni pha chuang lo a. US Open chu pawisa dawn tam theihna ber a ni mek a, nikuma singles champion pahnih Novak Djokovic leh Naomi Osaka te chuan €3.41 million (£2.99 million) ve ve an dawng a ni.

Copyright © inkhel.com 2024. All rights reserved.