French club lian Paris Saint-Germain chuan France-ah ro an rel chhunzawm zela, nizan zanlaiah khan French League Cup final-ah Lyon hnehin an champion.

French League Cup hi ti hian khelh a ni tawh dawn lova, nikum September thla khan he tournament hi tihtawp tura rel a lo ni tawh.

French League Cup final hnuhnung berah hian PSG leh Lyon te hi hun pangngaiah goal awm lovin an inhnehtawka, penalty shoot-out hmanga champion tur zawn a ni.

Team hnihte hian vawi nga ve ve shoot-out ah hian an pet goal hnuah PSG goalkeeper Keylor Navas chuan Bertrand Traore-a penalty a save a, PSG player Pablo Sarabia chuan pet goal ve lehin, PSG hi an champion ta a ni.

Final hi Stade de France-a khelh a ni a, stadium-ah chhungah hian entu mipui 5000 an awm.

PSG hian ti hian France rama trophy lian chawi theih pali an chawi kim veka, kum 6 liamta chhung khan France rama trophy awm te hi PSG hian vawi li ngawt an hui vek.

PSG hian France rama trophy chawi tur awm hnuhnung 36 zingah 25 ngawt an chawi thei a, tunah hian Champions League quarter final khel turin an inbuatsaih leh dawn a ni.