French Grand Prix pole position changtu Lewis Hamilton

24th June 2018, 03:06AM

Pathianni zan dar 7:40 ah Formula One French Grand Prix a awm dawn a, Inrinniah qualifying an tlan a, world champion Lewis Hamilton chuan pole position a chang.

Circuit Paul Ricard, Le Castellet, France a intlansiak turah Merecdes driver Lewis Hamilton chuan pole position a chang a, a teammate Valtteri Bottas chu pahnihnaah a awm ang a. Ferrari driver pakhat Sebastian Vettel chu pathumnaah a awm ang a, a hnungah hian Red Bull driver pahnih Max Verstappen leh Daniel Ricciardo te an awm ang.

Ferrari driver pakhat zawk Kimi Raikkonen chu parukna atangin a tlan tan ang a, a hnungah hian Renault driver Carlos Sainz a awm dawn a. Sauber-Ferrari driver Charles Leclerc chu pariatnaah a awm dawn a, pakuanaah Haas F1 driver Kevin Magnussen a awm ang a, a hnungah hian a teammate Romain Grosjean a awm ang.

Force India driver Esteban Ocon chu 11-naah a awm dawn a, a teammate Sergio Perez chu 13-naah a awm thung a, an inkarah hian Renault driver Nico Hulkenberg a awm ang.

British driver Lewis Hamilton hian Formula One khawvel a luhchilh hnuah pole position hi vawi 75 a chang ta chiah a ni.

French Grand Prix
French Grand Prix 2018 hi F1 World Championship round 8-na chiah a ni a, Circuit Paul Ricard-ah an intlansiak dawn a. French Grand Prix hnuhnung ber chu 2008 khan Magny-Cours ah neih a ni a, hemi tum hian Ferrari chu an chungnung hle a, Felipe Massa chu pakhatna niin Kimi Raikkonen chu pahnihna a ni a. Toyota driver Trulli chu pathumna a ni.

Sebastian Vettel chu tun season chhunga a vawi thumna atan Canda-ah chak ber a ni a, World Championship-ah Lewis Hamilton aiin point 1 chauhin hma a hruai a, Circuit Paul Ricard-ah hian an boruak a sang viauin a rinawm.

German driver ropui Michael Schumacher kha French Grand Prix a chak hnem ber niin, vawi 8 ngawt chak ber a ni a. French Grand Prix bikah chuan Ferrari chu team che tha ber an ni a, vawi 17 an chak tawh a, Williams chu pahnihnaah awmin vawi 8 an chak tawh a ni.

Circuit Paul Ricard


An intlansiakna tur hi Marseille khawpui bul, Le Castellet a awm niin 1969 khan an siam a, April 19, 1970 khan an hawng a. An intlansiakna tur hi lap khat 5.824 km niin, lap 53 an tlan dawn a, an tlan tluanchhuah chuan km 309.69 an tlan dawn tihna a ni.

Qualifying result
Lewis Hamilton (Gbr) Mercedes GP
Valtteri Bottas (Fin) Mercedes GP
Sebastian Vettel (Ger) Ferrari
Max Verstappen (Ned) Red Bull
Daniel Ricciardo (Aus) Red Bull
Kimi Raikkonen (Fin) Ferrari
Carlos Sainz (Spa) Renault
Charles Leclerc (Mon) Sauber-Ferrari
Kevin Magnussen (Den) Haas F1
Romain Grosjean (Fra) Haas F1
Esteban Ocon (Fra) Force India
Nico Hulkenberg (Ger) Renault
Sergio Perez (Mex) Force India
Pierre Gasly (Fra) Scuderia Toro Rosso
Marcus Ericsson (Swe) Sauber-Ferrari
Fernando Alonso (Spa) McLaren
Brendon Hartley (Nzl) Scuderia Toro Rosso
Stoffel Vandoorne (Bel) McLaren
Sergey Sirotkin (Rus) Williams
Lance Stroll (Can) Williams

Copyright © inkhel.com 2024. All rights reserved.