​Freekick lalpa Juninho

24th March 2020, 06:03PM

Juninho hi a hmingpum chu Antonio Augusto Ribeiro Reis Junior a ni a, mahse Juninho tih tawp emaw Juninho Pernambucano tia hriat lar a ni. Kum 45 mi Juninho hi kum 1975 January thla ni 30 khan Recife, Brazil-ah a pianga, 5ft 10’-a sang niin midfielder a ni a, football chanchinah mi tam tak chuan freekick pet thiam berah an dah.

Juninho hian kum 2014 February thla ni 2 khan football khelh a lo chawlhsan tawha, inkhelh a chawlhsan hnu lawk hian Brazil-ah football commentator hna a thawka, nikum May thla khan a club khelhna thin Olympique Lyon chuan an director of football-a tan an la lut ve leha, tun thlengin he hna hi a la chelh.

Sawi tawh angin Juninho hi freekick a pet thiam uchuak em avanga lar a ni a, football-ah freekick atanga goal khung hnem ber niin goal 75 ngawt chu freekick atangin a khunga, football-ah ani aia freekick pet thiam hi an awm bik lo tih ngam a ni.

Juninho hi a pianna khua Recife khaw club Sport de Recife chhulchhuak a ni a, kum 1993 khan Sport do Recife-ah a professional career bul tanin, Brazil-ah hriat a hlawh chho nghal. Sport do Recife-a kum hnih a awm hnuah Brazilian club Vasco da Gama chuan an la luta, hetah hian game 300 dawn khelin, trophy paruk a chawi bawka, kum 2001 khan French club Lyon chuan an la lut ve leh.

Juninho an lak luh hma in Lyon hi French top-flight league-ah an la champion ngai lova, mahse Juninho an lak luh atang hian a zawnin Lyon hi French top-flight league ah a zawnin vawi sarih ngawt an champion zui nghala, khawvelin Juninho a hriat chhoh tan tak takna pawh a ni. Kum 2009 May thla khan Lyon chairman Jean-Michel Aulas chuan Juninho-a’n season tawp ruala thlawna chhuah a dilna chu a pawmsak thu a puanga, hetih lai hian Juninho hian Lyon-ah kum khat dang contract a la nei.

Lyon chhuahsanin kum 2009 nipui lai khan Juninho hi Qatari club Al-Gharafa ah a insawna, hetah hian kum hnih daih contract ziakin, hemi hun chhung hian euro maktaduai 2.5 hlawh turin an inrem. Kum 2011 khan Juninho hi a club hlui Vasco da Gama-ah a kira, a kum leh kumtawpah MLS club New York Red Bulls chuan an la lut. Kum 2013 nipuiah Juninho hian New York Red Bulls chhuahsain a club hlui Vasco da Gama chu a vawi thum nan a zawma, hetah hian a hun hmang zovin, kum 2014 February thla khan inkhelh a chawlhsan fel ta a ni.

Juninho hi a ram Brazil tan kum 1999 atang khan a inkhel tana, kum 2001 Copa America-ah khan Brazil tan a khela, mahse kum 2002 World Cup leh kum 2004 Copa America-ah te Brazil hian an ko lo. Kum 2005 FIFA Confederations Cup-ah khan champion team Brazil squad-ah Juninho hi awmin, kum 2006 World Cup-ah pawh a ram ai a awh leha, mahse he World Cup-a an tlak hnu hian la upa lo mahse Juninho hian ram tana khelh a chawlhsan ta a, Brazil tan hian game 40 khel hmanin goal 6 a khung hman.

Juninho hi football khawvelah chuan ball thi (ball nung lo lai) chhuih thiam bera ngaih a ni a, a freekick peta a technique hman hi ‘knuckle balling’ tih niin Ronaldinho pawh khan a hmang fo va, boruaka ball a awm lai hian ball hi a vir lo tluk a ni. He technique hi pet fuh chuan ball-in boruakah a kalkawng a thlak thut thina, hemi avang hian goalkeeper tan ball lo kalna tur hisap hleitheih a ni lova, Juninho hlawhtlinna em emna chhan pawh he technique hi a pet chhuah thiam em vang a ni.

Juninho hian metre 40 chin leh a aia hla atangin tum li ngawt freekick a chhuih goal tawha, a freekick pet dan hi player kan hriat lar tam takin an lo entawn tawh thina, chung zingah chuan Andrea Pirlo, Didier Drogba, Cristiano Ronaldo leh Gareth Bale-te hi a langsar zual an ni.

Ball thi a chhuih thiam mai bakah Juninho hi player tangkai tak a ni a, a khel a finga, game a mana, passing pawh tha tak niin a career chhungin assist thahnem tak a nei bawk. Player taima a ni a, team tana inpe zo tak leh chaiai ngai lo a nih a, leadership quality pawh nei tha in Lyon leh Al-Gharafa ah te hian captain a lo ni tawh thin. Juninho hi player versatile tak niin, attacking midfield-ah khel ber mahse wing lamah leh central-midfield ah te pawh a khel thei ve ve a, khelh tir a ni fo thin reng bawk.

Juninho hi ni khat chhunga ram hrang pahniha top-level football pahnih khel thei professional footballer tlemte zinga mi a ni a, kum 1999-a Vasco da Gama tana a khelh lai khan September ni 7-ah friendly match-a Brazil leh Argentina an inkhelh tumin, Juninho hian minute 15 vel a khela, hemi hnu hian Uruguay-ah thlawk nghalin, Copa Mercosur inelnaah Vasco tan Nacional a hmachhawn leh bawk a ni.

Copyright © inkhel.com 2024. All rights reserved.