Marc Marquez chu French MotoGP ah pakhatna a ni a, world championship lamah hma a hruai fal tan a, a title humhim turin beiseina a sang viau zel.

MotoGP champion lai Marquez hian a Honda bike chu Le Mans-ah chak ber a nihpui a, helai track-ah hian chak ber a nih vawi hnihna chiah a ni a. Nikum khan he circuit-ah hian a chesual a, a tlan tluanchhuak thei lo a, 2016 ah pawh 13-na a ni pha chauh bawk.

Kum 25-a upa Marc hnungah hian Ducati rider Danilo Petrucci chu thlengin pahnihna a ni a, kum 39-a upa, world champion pawh vawi 7 ngawt lo ni tawh Valentino Rossi chu pathumna a ni.

Intlansiak tan tirh atanga lap 4 inkarah bike tlu a awm nual a, heng zingah hian Johann Zarco leh Andrea Dovizioso te chu a langsar pawl an ni a. Zarco hian pole position atangin bul a tan a, French rider zingah 1988 a Christian Sarron hnua pole position chang leh thei hmasa ber a ni a, intlansiakah erawh a che fuh ta lo.

Marquez hi pahnihna atangin a tlan tan a, Zarco nen hian bul an tan tha vak lo a, Jorge Lorenzo chuan an pahnih hian a rawn lehpel a, Le Mans-ah vawi ruk chak ber nihna hauh a tum hle a. Dovizioso chu pahnihnaah a awm bawk a, Zarco chu pathumnaah tlanin Marquez chu palinaah a tlan a.

Lap 4 an tlan a, Dovizioso chu a chesual a, a Ducati bike chu a kual zaupui lutuk a, track pawnah a tawlh chhuak a. Hemi hnu deuh hian Yamaha rider Zarco pawh a chesual zui ve leh nghal bawk.

Lorenzo a chesual ve teuh hle a, Marquez chuan lap 18 a la awm tihin a rawn lehpel a, hmahruaitu a ni ve leh ta a. Petrucci pawhin Lorenzo hi a rawn lehpel ve leh a, lap 14 a la awm tihin Lorenzo hian Rossi a inlehpelhtir zui leh bawk a ni.