July thlaah khian New York khawpuiah Fortnite World Cup neih a ni dawn a, he intihsiakna hi ni thum chhung awh tur niin, lawmman pawh $30 million zet a awm tling dawn a ni.

Fortnite chu khawvel pumpuia game khelh nasat ber niin an chhal mek a, tuna an hriat theih chinah he game kheltu hi an pung nasa hle a. February 16, 2019 thleng khan khawvel pumah Fortnite kheltu hi 7.6 million an tling tawh niin an sawi.

He game kheltu hi an tam chak hle a, a aia tam zawkin an khelh zel theihna turin tan an la chho reng bawk a. Khawvel hmun hrang hrangah tournament lian an buatsaih chho ve reng a, hengah hian pawisa pawh a tam thei hle.

Epic Games chuan an website-ah Fortnite World Cup neih a nih tur thu hi an tarlang a, ruahman dan chuan July 26-28 chhungin he inelna hi neih a ni dawn a, ni thum chhunga inelnaah hian pawisa dawn theih tur pawh a tam tham hle a, $30 million zet a awm dawn a ni.

Nikum khan The International Dota 2 tournament ah pawisa a tam hle a, $25.5 million zet a awm a, kumina Fortnite World Cup a pawisa awm chuan a khum thei dawn a. eSports chanchinah video game vanga pawisa dawn theih tam ber tum a ni thei dawn a, Fortnite chuan record thar a siam thei dawn ta a ni.

April 13 atangin world cup kalkawng hi an hawng tan ang a, June 16 thleng a awh chho dawn a. Kar tin lawmman dawn theih tur $1 million vel a awm ziah dawn a, top 100 solo player te leh 50 duos team te chu World Cup khel thei tur hian an tling dawn a. World Cup hi New York khawpuia neih tura ruahman niin, player tel zawng zawngte chuan $50,000 an dawng theuh dawn a, solo champion chuan $3 million chu a dawng thei dawn bawk a ni.

April thla laihawl atangin online qualifier an nei tan dawn a, heta tel thei tur hian kum 13 tlin a ngai thung a. Tel tum kum 13 leh 17 inkar te chuan an chhungte atangin phalna an lak hmasak phawt a ngai dawn a ni.

Ruahmanna an siam pakhatah chuan 2019 competitive season-a lawmman lak theih tur zawng zawng belh khawm chu $100 million vel zet a ni dawn a ni.