Red Bull chuan an car ruangam leh Aston Martin car thar a inan em avangin Aston Martin hi an hek.

Tunkar tawpa tlan tur Spanish Grand Prix atan Aston Martin hian car an ti danglam hret a, en mai chuan Red Bull car nen a inang hle nghe nghe.

Red Bull F1 boss Christian Horner chuan an thiamna ruksaktu an awm niin a sawi a, Aston Martin hian FIA pawmpuina thlapa car thar nei an nih thu an sawi thung.

FIA hian Aston Martin car thar chungchangah team dang tihdan lakchhawnna an hmu lo tih an sawi a intlansiak an phalsak bawk.

Red Bull hian FIA ṭawngchhuah hnuah thuchhuak an nei ve nghal a an buaina hi a reh mai dawn lo niin a lang.

Aston Martin hian tunhnaiah Red Bull staff member an lalut nual a, an lakluh zingah hian Red Bull-a head of aerodynamics ni ṭhin Dan Fallows pawh a tel.

Kum 2020 khan Racing Point an nih laiin tuna an buaina ang deuh hi an tawng tawh a, Mercedes tihdan an lakchhawn avangin 15 point paihsak an ni a €400,000 chawitir an ni bawk.

Tun season-ah Aston Martin hian beisei an pha lo hle a, Red Bull erawh World Champion nih tumin Ferrari nen an inel mek a ni.