Formula One season an tan leh dawn hnai tawh a, inpuahchahna a kal chho mup mup a. Tun season chhunga team hrang hrangte’n entry fee an pek zat tur chu puanzar a ni tawh a, nikuma constructors’ championship title latu Mercedes chu pakhatna an nih avangin entry fee hi an pe hnem ber dawn a ni.
Nikumah khan season tawpah Lewis Hamilton chu driver champion a ni a, Mercedes chu constructor champion an ni bawk a, Sebastian Vettel chu pahnihna niin, team zingah Ferrari chu pahnihna an ni bawk a ni.
Tun hnai khan Motorsport.com chuan team tinte pawisa chawi tur zat hi an puang a, F1 team zawng zawngte chuan season tluana an telna tur base entry fee $5,46,133 (Rs. 3,89,20,168.24) an pek vek a ngai a, hemi bakah hian season hmasaa an chet that dan azirin an pawisa pek tur hi a pung hlawm a ni.
Season liam taa constructors’ title latu Mercedes chu pakhatna an nih avang khan base entry fee bakah point khat an score zelah $6,553 (Rs. 4,66,999.54) an pek belh a ngai a. Team dang pakua te pawhin base entry fee bakah 2018 chhunga point an hmuh zelah $5,459 (Rs. 3,89,035.64) zel an pek belh a ngai dawn bawk a ni.
Force India ni thin, Racing Point tia a hming an thlak tak pawhin Belgian Grand Prix hmaa a neitu an inthlak hnua an point hmuh behchhan khan entry fee hi an pek a ngai dawn a ni.
F1 2019 season chu February thla atangin an tan dawn a, test session vawi hnih a awm ang a, February 18 leh 21 inkar bakah February 26 atanga March 1 chhungin Circuit de Barcelona ah test session hi an nei dawn a ni.
A hnuaia tarlan ang hian F1 team hrang hrangte chuan entry fee hi an pe dawn a, 2018 a entry fee an pek nen tarlan a ni.
Mercedes
2019: $4,838,348
2018: $4,653,720
Ferrari
2019: $3,663,222
2018: $3,210,170
Red Bull Racing
2019: $2,833,454
2018: $2,415,376
Renault
2019: $1,212,131
2018: $810,305
Haas
2019: $1,053,820
2018: $758,695
McLaren
2019: $884,591
2018: $670,958
Racing Point
2019: $830,001
2018: $1,481,235
Sauber
2019: $808,165
2018: $541,933
Toro Rosso
2019: $726,280
2018: $789,661
Williams
2019: $584,346
2018: $944,491