02 Jun 2020 04:05

inkhel

Formula 1 season an tan ve dawn ta

2020 Formula 1 season chu July 5 atangin an tan ve thei dawn ta a, tun season chhungin intlansiak vawi 8 a awm dawn a, Austria-ah bul an tan ang.

F1 chuan coronavirus vanga infiamna chi hrang hrang an chawlh thup avangin kuminah bul an tan thei rih lo a, intlansiak eng emaw zat chu an thulh tawh nghe nghe a. Tunah chuan 2020 season bul tan a nih tawh tur thu an puang a, a bul tanna chu Austria-ah July 5 ah khian an nei dawn a ni.

Red Bull Ring-ah July 3 atanga July 5 chhungin Austrian Grand Prix in bul an tan ang a, hemi hnu July 10 atanga July 12 chhungin Red Bull Ring-ah Steiermark Grand Prix a awm leh dawn bawk a. July 17 atanga July 19 chhungin Hungaroring-ah Hungarian Grand Prix a awm leh dawn bawk a ni.

British Grand Prix chu Silverstone-ah July 31 atanga August 2 chhungin a awm ang a, kar khat hnu, August 7 atanga August 9 chhungin Silverstone-ah vek hian 70th Anniversary Grand Prix a awm zui ang.

August 14 atanga August 16 chhungin Spanish Grand Prix a awm ang a, August 28 atanga August 30 chhungin Belgian Grand Prix a awm ve leh dawn bawk a. Hemi hnu, September 4 atanga September 6 chhungin Italian Grand Prix a awm leh dawn a ni.

Europe khawmualpui bikah chuan a chunga tar lante khi an intlansiakna tur ho an ni a, hei bak hi chu thuneitu lampang hian thu puanzar an la nei rih lo a. Hmun dangah hian engtin nge an tih zel dawn tih chu la ngaihchan leh rih tur a nih hmel hle.

Rin dan pakhatah chuan F1 hian December 6 ah khian Bahrain lama intlansiak theih an ring hle a, December 13 ah pawh Abu Dhabi-ah intlansiak theih an ring viau bawk a ni.

Tun dinhmunah chuan Russian Grand Prix, Azerbaijan, US, Mexico leh Brazil te chu an chiang lo hle a. Heng ramah te hian COVID-19 vei an thahnem viau mai a, hei vang hian intlansiak theih hi an beisei ngam chiah lo a ni.

F1 2020 opening calendar

3-5 July - Austrian Grand Prix (Red Bull Ring)

10-12 July - Steiermark Grand Prix (Red Bull Ring)

17-19 July - Hungarian Grand Prix (Hungaroring)

31 July-2 August - British Grand Prix (Silverstone)

7-9 August - 70th Anniversary Grand Prix (Silverstone)

14-16 August - Spanish Grand Prix

28-30 August - Belgian Grand Prix

4-6 September - Italian Grand Prix