Khawvela car intlansiak ropui ber tih theih Formula 1 huangah hian reserve driver an pawimawh hle a, coronavirus hri leng karah phei chuan an pawimawh lehzual a. Nikumah pawh khan sawi lawk vak lohin reserve driver hi an hmang thut thut fo a ni.
Season hman zawh takah khan Nico Hulkenberg chu Racing Point tan vawi thum a inlan hman a. Silverstone intlansiak vawi hnihah Sergio Perez ai a awh bakah, Eifel Grand Prix-ah khan Lance Stroll ai a awh bawk a. Mercedes reserve driver George Russell pawhin Sakhir Grand Prix-ah khan COVID-19 vei vanga inlan thei lo Lewis Hamilton ai a awh bawk a ni.
2021 Formula 1 season neih chhoh mekah pawh reserve driver hi an awm nual a, driver langsar si lo, pawimawh em em si an nih avangin tu tu nge an nih tih hi han bih chiang ila.
Alexander Albon - Red Bull & Alpha Tauri
An lo tih thin angin Red Bull leh Alpha Tauri te chuan reserve driver hi an intawm leh dawn a. A hmaa an lo chhawr tawh thin, British-Thai driver Alex Albon chu an reserve driver tur niin, Albon hi a chet fuh theih loh em avanga Formula 1 huanga inlan ve thei ta lo a ni.
Stoffel Vandoorne & Nyck De Vries - Mercedes & McLaren
McLaren leh Mercedes te chuan reserve driver an intawm ve dawn a, team pahnihte hian EQ Formula E team driver pahnih Stoffel Vandoorne leh Nyck De Vries te chu reserve driver atan hian an hmang ang.
Stoffel Vandoorne hi 2017 leh 2018 season-ah khan Formula 1 huangah a lo inlan ve tawh a, McLaren car a khalh a. 2010 atanga 2019 chhung khan Nyck De Vries pawh McLaren Young Driver Program ah a tel thin a ni.
Nico Hulkenberg - Aston Martin
Aston Martin chuan Nico Hulkenberg chu reserve driver atan an hmang leh dawn a, season hnih an inhrawn dawn ta chiah a. German driver hi 2019 season tawpah khan Renault chuan an lo hnawl tawh a ni.
Season liam taah khan Hulkenberg hi a che chhe hran lo hle a, intlansiak vawi thumah point 10 chu a hmu thei a, inlan tam lem lo mahse 2020 drivers’ standing-ah khan 15-naah a awm theih phah a ni.
Antonio Giovinazzi - Ferrari
Ferrari chuan reserve driver atan Antonio Giovinazzi an hmang dawn a, anni chiah hi reserve driver atana driver pangngai hmang an ni a. Giovinazzi hi Alfa Romeo driver a ni a, heti chung hian 2021 chhung chuan Ferrari hian an chhawr tel dawn a ni.
Robert Kubica - Alfa Romeo
Formula 1 driver thin Robert Kubica chu Alfa Romeo hian reserve driver atan an hmang dawn a, season hmasa lamah pawh khan an lo hmang tawh bawk a ni.
Daniil Kvyat - Alpine
Alpine hian reserve driver an nei tha hle a, tawn hriat nei tha berte zinga mi an chhawr dawn a. Alpha Tauri chuan Daniil Kvyat hi hnawlin Yuki Tsunoda chu an driver atan an thlang a, hei vang hian Alpine chuan Russian driver hi an hman tangkai theih dawn phah a ni.
Formula 1 huangah Kvyat hi a lo che fuh ve nual tawh a, podium ah pawh vawi thum chu a chuang kai ve hman a, a chet fuh ber chu 2019 kuma ruah sur hnuaia German Grand Prix intlansiakah khan a ni.
Pietro Fittipaldi - Haas F1 Team
2020 season intlansiak hnuhnung pahnihah khan Haas F1 Team chuan an driver Romain Grosjean aiawh turin an reserve driver Pietro Fittipaldi an chhawr a, tun season-ah pawh reserve driver atan hian an chhawr zui leh a ni.
Jack Aitken - Williams
Sakhir Grand Prix-ah Jack Aitken hian Formula 1 boruak a tem tan a, Williams tan hian a inlan a. Tun season-ah pawh Canadian driver hi Williams chuan an chhawr zui ta zel a ni.