Tun hnai lawkah Forbes chuan khawvela infiammi hausa zual 100 an thlan chhuah chu an tichhuak a, heng zinga Formula 1 driver hausa zual pathum thlang chhuak ve leh thung ang.
3. Fernando Alonso
Lakluh zawng zawng: $33 million
(Hlawh: $32 million; Fakna: $1 million)
Fernando Alonso hi tunlai F1 khawvelah chuan driver tha ber pawl a ni a, tunah hian McLaren Renault F1 team ah a awm mek a. A hmain team lian Ferrari, McLaren Mercedes leh Renault ah te a lo awm tawh a ni.
Renault driver a nih lai kha a tawn san lai ber a ni a, 2005 leh 2006 te khan drivers’ World Championship title a la a. Ferrari a zawm hnuah title hi tum hnih chu a la leh teuh hle a, mahse a puitlin ta lo a. 2015 khan McLaren a zawm leh a, an che chhe ta viau mai a. McLaren a zawm atangin podium a la lawn leh ta miah lo.
Nikum khan McLaren chuan Alonso hi contract an pawhseisak a, F1 bakah hian Alonso hian hmalakna a nei bawk a, thawmhnaw company Kimoa din chhuaktute zinga mi a ni a, hei hi nikum khan an ti tan chiah a. 2017 ah tho hian McLaren sponsor Logitech nen eSports racing team a din tan bawk.
Alonso hi Formula 1 ah vawi 32 a chak tawh a, driver awm tawh zingah chuan chak hnem lamah parukna a ni a. Forbes list-ah chuan 39-na niin, a thil neih hlut zawng chu $220 million niin an chhut.
2. Sebastian Vettel
Lakluh zawng zawng: $42.3 million
(Hlawh: $42 million; Fakna: $300k)
Vettel hi Scuderia Ferrari team driver a ni mek a, 2018 season chhunga intlansiak hmasa pahnihah chak ber a ni a. Kuminah pole position vawi 3 a chang tawh a, drivers’ championship-ah pahnihna a ni mek bawk a, kuminah chuan champion tura rin kai zingah a tel.
Red Bull Racing driver a nih laiin vawi 34 a chak a, 2010 leh 2013 inkarah vawi 4 ngawt mai F1 World Championships title a la a, 2013 khan vawi 13 ngawt chakin, 2004 a Michael Schumacher record a nihrual a ni.
2015 khan Vettel hian Ferrari a zawm a, title a la leh ta miah lo a, heti chung hian Italian team hian hlawh an pe tha hle a. Nikum khan 2020 thleng Ferrari a awm turin contract a pawt sei a, an inremnaah chuan Ferrari hian kum khatah Sebastian Vettel hi $40 million an pe a ni.
Forbes list-ah chuan Vettel hi 18-na a ni a, a neih hlut zawng chu $55 million niin an chhut.
1. Lewis Hamilton
Lakluh zawng zawng: $51 million
(Hlawh: $42 million; Fakna: $9 million)
Hamilton hi 2018 F1 drivers’ championship hmahruaitu a ni mek a, Spanish Grand Prix ah a chak ber a, Monaco GP ah pawh podium a lawn pha bawk a. Mercedes AMG F1 team driver a ni mek.
Lewis Hamilton hian kum thum chhung atana contract a ziah chu a hmang zo tawh dawn a, hei vang hian team hrang hrangte chuan lakluh dan an lo ngaihtuah ru tan tawh a. Mahse Mercedes nen hian contract lian tham tak an ziak dun leh hnai niin an sawi a, a dik a nih chuan Hamilton hian 2021 thleng Mercedes a awm turin contract a ziak ang a, $120 million vel bawr chu a lakluh an ring.
British driver Hamilton hian fakna lamah sum a hui hnem rih hle a, company lar tak tak Mercedes-Benz, Tommy Hilfiger, Puma, Sony, Monster Energy, Bombardier, Bell Helmets leh MV Agusta Motorcycles te nen an inzawm mek a. Forbes list-ah 12-na a ni a. A thil neih hlut zawng hi $240 million vel niin an chhut.