Formula 1 hi infiamna huanga awm zingah chuan buaithlak ber pawl, tih thlap thlap ngai lehzual a nih rualin F1 car man zat hi a nihna ang tak sawi chian harsa tak a ni thung.

Car changkang tak intlansiakah hian an car hman thin siamna atan hian pawisa chu an hmang hnem khawp mai a. A nihna takah chuan car siamna atana an sum sen zat hi chiang taka sawi a harsa ve hle a, hei vang hian an sum hman bawr vel hi an sawi mai thin.

2018 kumah khan Ferrari leh Mercedes te chuan car siamna vel atan $400 million chuang zet an hmang a, Haas leh Williams te chuan hemi kumah hian $150 million vel bawr an hmang thung a. Hetiang deuh hian F1 car man hi a inang lo thei hle a, man to deuha siam an awm laiin tlema man tlawm zawk pawhin a siam theih tih a chiang hle.

2021 kum atang chuan team hrang hrangte pawisa hman theih zat hi bithliah fel a ni tawh dawn a, thuneitute chuan team hrang hrangte tan $175 million aia tam hman theih loh tiin thu an dah tawh dawn a ni. He dan hi an hmang a nih chuan team hrang hrang pawh an inrualkhai ve thei deuh tura ngaihna a awm a ni.

2019 atang khan F1 car rih zawng chu a driver nen a tlem berah kg 740 ni tura tih a ni a, heta kg 80 chu a driver leh a seat rihna a ni a. Hetianga bithliah bik an neih takah chuan driver zang deuh zawkte chan a tha bik tawh chuang lo niin an sawi.

F1 car tlan chak zawng pawh sawi chian pawp theih a ni lo a, a track dinhmun azir te pawh thui tak a ni tel a. Sebastian Vettel chu 2019 kumah khan Monza cicuit-ah 359.7 km/h a chakin a tlan thei a, hemi kum vek hian Sergio Perez pawh Mexico City ah 359.7 km/h hian a tlan ve bawk a, anni hi tlan chak bera sawi an la ni.

An intlansiak thui zawng chu km 305 an tlan thlenin a ni tlangpui a, circuit hrang hrangah km 305 an tlan tlin theih dan tur an chhut a, lap zat tur pawh hetiang hian an chawk chhuak mai thin. A tlangpuiin intlansiak hi darkar khat leh a chanve velah an zo thin a, eng emaw harsatna a awm a nih chuan a aiin a rei deuh thin a. Singapore Grand Prix ah hian an tlan rei ber a, darkar hnih vel an intlansiak tlangpui a ni.

Team hrang hrangte hian an engine chak zawng hi chiang takin an sawi ngai meuh lo a tih theih a, hetih rual hian team chungnung deuhte chuan 2019 kumah khan 1000 bph te pawh an thleng pha niin an sawi a. Tuna V6 hybrid engine an hman pawh hi team azirin a inang lo hlawm hle niin an sawi.

Car a pawimawh rualin a khalhtu an pawimawh em em a, F1 driver te hlawh zat hi a inang lo hlawm ve hle mai a. Tunlaia driver zingah chuan Lewis Hamilton leh Sebastian Vettel te chu a hlawh hnem deuh ber niin an sawi a, anni hian $40 million aia tam an hlawh niin an sawi.

Tlema driver lar vak lo chuan $1 million emaw, $2 million emaw te pawh an hlawh ve bawk a, an hlawh lak zat hi an team awmna azir te, an that leh that loh dan azir te pawhin a danglam ve hlawm hle a ni.