Paris khawpuia hmun lar berte zinga mi Notre Dame Cathedral chu kangmeiin a tichhe nasa hle a, darkar 15 vel zet a kan hnuah an thelh thei chauh a. Kum 850 zeta upa a kang chhia hi thil uiawm tak a ni a, a hria apiangin an ui hlawm hle a, footballer pawhin an ui thu an sawi chhuak nasa hle.

French club lian Paris Saint-Germain chuan Twitter lamah pawi an tih thu hi an tarlang nghal vat a, kangthelhtute inpekna leh huaisenna chu an fak hle a. Paris khawpui timawitu langsar zual zinga mi a kang chhe ta mai chu lungchhiatthlak an tih thu an tarlang a ni.

PSG chuan, “Kan khawpui timawitu langsar berte zinga mi Cathedral Notre-Dame de Paris chu a kang hluah mai a, a thlalak en hrehawm tak tak hmuh tur a awm teuh lehnghal a. He kangmei thelh a nih thehna atana huaisen taka thawktute an fakawm hle a ni,” an ti.

Saudi Arabia club Al-Hilal lama khel mek, French striker Bafétimbi Gomis pawhin pawi a tih thu hi a tweet ve bawk a. “Kangmeiin Notre Dame Cathedral a bawh khat mup mai han hmuh chiah chuan rilru a na vawng vawng a, a thlalak en ringawt pawh a lungchhiatthlak tak zet a ni,” a ti.

Real Madrid manager Zinedine Zidane chuan, “A pawi tih mai loh chu sawi vak ngaihna pawh ka hre lo. Hetiang thil hi thleng lo se tih hi ka duhthusam a ni a, eng vanga thleng nge tih pawh ka hre lo a. Tu chungah mah thleng miah lo turin ka duh hle a, kangmei vanga nunna chan leh hliam tuar awm lo hram se ka ti a ni,” a ti.

Didier Drogba, Adrian Rabiot, Kylian Mbappe, Neymar leh Alexandre Lacazette te pawhin social media kal tlangin Notre Dame Cathedral kang chu pawi an tih zia an au chhuak bawk a ni.

France president Emmanuel Macron chuan kangmei an thelh fel hnuah a pawi thui zel tur an ven theih tawh thu a sawi a. Kangmei chhuah chhan chu uluk taka chhui a nih tur thu sawiin, Notre Dame Cathedral sak that a nih leh theihna turin pawisa pawh a theih ang anga tuak a nih tur thu a sawi bawk.