England leh Wales rama professional footballer te chuan chi inthliarna an do a, an tanrual zia lantir nan Zirtawpni zing dar 9 atanga Inrinni zing dar 9 thlengin social media an hmang dawn lo a ni.

Professional Footballers’ Association (PFA) chuan chi inthliarna leh hetiang hawi zawnga inhmuhsitna hi an do a ni tih lantir turin an tangrual a. Zirtawpni zing atanga Inrinni zing thleng hian social media hmanrua hrim hrim an hmang dawn lo vek a, an hman theih laiin #Enough campaign bul tanna atan social media hrang hrangah chuan #Enough tih milem an dah hlawm a ni.

Player te chuan #Enough tih milem an tarlan bakah ‘Chi inthliarna leh hetiang hawi zawnga inhmuhsitna hi kan do tlat a ni’ tih thu ziak an dah tel bawk a ni.

“Kan eizawnna leh kan ni tin nun dan hian mawhphurhna lian tak a keng tel tih kan hria a, hei vang tak hian kan vaia tangrualin chi inthliarna leh hetiang lampang hawi zawnga inhmuhsitna do nan kan mawhphurhna chu kan hmang tangkai a. Kan zavai hian social media kaltlangin football khawvela mi te chu kan tih anga ti ve zel turin kan sawm a ni,” tiin PFA chu an au chhuak.

Tun hnaiah chi inthliarna leh inhmuhsitna hi a awm fo a, khelmual chhung leh pawnah pawh sawi tur a awm leh thin a. Hetiang lampang a thlen fo avang hian PFA chuan hma lak a tul an ti a, tuna mi hi an duang chhuak ta a. Hetianga an tih zarah hian thuneitute chu an chet zui ve an beisei thu an sawi.

“Tuna hma kan lak hi football huang chhunga chi inthliarna leh hetiang lam hawia inhmuhsitna dona kawnga ke kan pen hmasakna chauh a la ni a. Player te inlungrual zia tilangtu niin, social network leh football thuneitute’n chak zawka hma an lak theihna atana hmalakna a ni a. Hetianga hma kan lakna zarah hian khelmual chhungah leh pawnah kan thil do hi a ziaawm phah zel theih kan beisei a ni,” an ti.

Manchester United captain Ashley Young chu UEFA Champions League quarter final-a Barcelona an hneh loh khan hetiang lam hawi hian autu an awm a. England player zinga mi, Tottenham defender Danny Rose leh Manchester City star Raheem Sterling te pawh thla hmasaa Montenegro-a Euro 2020 an khelh tumin an lo au nawmnah bawk a. Danny Rose phei chuan a hnuah football khelh chawlhsan vat a chak thu a sawi chhuah phah hial a ni.