Roma chuan an player te hnenah pop star Drake chu thla lakpui rih lo turin an hriattir a, Drake chu football team te tan vanduaina a nih thu an sawi.
Canadian singer Drake hian tun hnaiah larna duhawm em em lo deuh mai a nei a, football player te thla a lakpuiin emaw, eng team jersey emaw ber ha chunga thla a lak emaw chuan chu team te chu an vanduai duh hle niin an sawi.
Kar hmasa tir lamah khan Paris Saint-Germain defender Layvin Kurzawa pawhin Drake hi thla a lakpui a, Pathianni khan PSG leh Lille te chu an inkhel a, he inkhelah hian PSG chu 1-5 ngawt maiin an tlawm a, kum 19 chhunga an tlawm chian ber a la ni.
Arsenal leh Manchester City pawhin Drake hi an lo vanduaipui ve tawh bawk a, English club pahnih player thenkhat te chuan Drake hi thla an lakpui a, a hnua an inkhelhin an chak lo zui ve ve a ni.
Pierre-Emerick Aubameyang chuan Drake hi thla a lakpui a, hemi hnu hian Gunners chuan beiseina sang tak nei chungin Goodison Park-ah Everton an lenchilh a, mahse Everton hian 1-0 in an lo hneh a ni.
Sergio Aguero chuan Manchester khawpuia Drake-a’n concert a neih tumin Canadian star hi a selfie pui a, hemi hnu hian UEFA Champions League-ah Tottenham Hotspur nen an inkhel a, Aguero hian penalty a pet goal lo a, a ball pet chu Hugo Lloris chuan a lo dang a, he inkhelah hian City chu 0-1 in an tlawm zui a ni.
Ngaihbel theih tura thil a awm tak fo avang hian Roma chuan season thara Champions League khelh theih beiseina an neih mek chu a thlen theih loh palh an hlau a, an tana pawi thei tur apiang laka inven chu an duh phah a. Hetianga fimkhur taka beihpui an thlak chhohna turah hian an player te hnenah Drake chu thla lakpui khap a nih thu an puang a ni.
Roma hian Twitter lamah, “Roma player zawng zawngte chu season tawp hma chuan Drake nen thla lak dun kan phalsak lo a ni,” tiin an tarlang.
A hmaa tarlan bakah Drake vanduaipuitu dang pawh an la awm cheu a, Jadon Sancho chuan he zaithiam hi thla a lakpui a, a hnuah Borussia Dortmund chuan 0-5 ngawtin Bayern Munich an hneh lo a. Paul Pogba pawhin thla a lakpui bawk a, a hnuah FA Cup khelin Wolves lakah an tlawm bawk a ni.
2016 khan Drake hian Juventus away jersey chu thla a lakpui a, hemi hnu hian Champions League final-ah Old Lady hian Real Madrid an hneh lo a ni.