Khawvela mihring tungchhoa kal zawng zawng zingah harsatna tawk lo an awm thei dawn em ni? Harsatna hmachhawn theuh theuh zingah huaisen leh huaisen lote dinhmun erawh a intlau khawp ang le. Mi thenkhat chuan harsatna an tawhin bui lung tawk ang hlauhin an kir a, helna kawng an zawng thin, heng footballer pali kan rawn tarlante hi chuan a tawp thlengin an sual a, an sualchhuak ta hlawm a ni.
Gerard Pique
Pique leh zaithiam Shakira te an han inkawp nawlh hi chu football khawvelah chanchin ngaihnawm a ni chiang mai. Engtin nge hemite pahnih an intawn theih? Engtin nge Spanish defender hian Colombian singer thinlung hi a hneh theih? World Cup 2010 khelh hma khan Waka Waka music video shoot-in Shakira chu Madrid-ah a khawsa, hemi tum hian Pique chuan Shakira phone number a dil, chumi hnu atang chuan thil a danglam chho ta.
South Africa World Cup opening ceremony-a zai turin Shakira chu a kal ta a, Pique chuan a vawi khat nan message a thawn, "South Africa sik leh sa khawchin enge?" tiin. "Ka ngaina che," tih thawn hmasak zawk awm kan ti a ni maithei, Pique hi a zeilo nge? Star te biak nan chuan a va thawn ho teh lul em!
Pique chuan a beisei phak bakin chhanna a dawng ta tlat mai, Shakira chuan nilengin khawchin a rawn update ta chur chur mai. Pique chuan, "Henu hi a danglam ve tlat mai a," a ti hial. World Cup 2010 tournament chhung zawng khan phone hmangin an inbia, Pique chuan Shakira hmuh leh theihna chance a neih that ber chu World Cup final luh a ni tih a hria.
World Cup Closing function-ah Shakira a zai dawn, chumi huna an intawn theih dan tur tha ber chu chak chhoh char char a; final luh a ni. Chuti chuan Pique chuan heti hian Shakira hnenah thu a thawn ta a, "Nangmah hmu leh thei turin World Cup ka chawi dawn a ni," tiin. A thutiam a hlen, World Cup a chawi ta ngei a, vawiin thlengin an inkawp chho ta a, fa duhawm tak pahnih an nei tawh bawk a ni.
Lorenzo Insigne
A nupui hi awm lo selang chuan Insigne hi player tha tak a ni tih vawiinah kan sawi kher lo maithei a ni. A ngaihzawng Genoveffa Darone chu Naples-a awm niin Napoli fan a ni bawk. Ani avang hian Napoli tan a khelh leh theih phah kan ti lo thei lo.
Genoveffa Darone a hmuh hmasak ber hian Insigne chuan, "Ka hmuh hmasak ber ni atang khan a kianga awm ka duh nghal a ni," tiin a sawi nghe nghe. Insigne hi Naples awmna Campania huamchhung Frattamaggiore-a piang leh seilian a ni a. Napoli-ah Youth Academy kalin hetah hian a puitling chho, mahse Napoli tan chance a nei thei mai bik lo, loan-in an kalchhuah tir ta a.
A star awmna leh a football khelhna chu 250 KM laia inhlat a ni tlat mai bawk si nen. Khatih hun laia Napoli boss Walter Mazzari chuan,"Hemi hmunah hian hmun chan i duh chuan i hlawhchhuak tur a ni," tiin a hrilh. Italian forward Insigne chuan a hmangaih awmna Napoli pan leh turin a theihna zawng zawng a chhuah ta.
Loan-a a chhuahna Serie B team Pescara tan theihtawp a chhuah a, season khat chhungin goal 18 lai a khung tling ta der mai. A naupan lai atanga a club hmangaih Napoli-a kir leh turin theihtawp a chhuah, a club hmangaihna aia nasaa a hmangaih Genoveffa Darone tan a theihna zawng zawng a sawrchhuak. Tichuan Napoli-ah a kir leh ta a, kum 2012 khan an innei chhunzawm ta bawk a ni.
Luis Suarez
Uruguay-a piang leh seilian a ni a, a naupan laiin Uruguay-ah a inkhel thin, kum 15 mi a nih laia a hmangaih hmasak ber Sofia Balbi chu a football career ti danglamtu a ni chho ta. "Kum 15 mi ka nih laiin football khelh hi ka tan a pawimawh zia min hrilhtu hmeichhia ka tawng," tiin Suarez chuan a sawi nghe nghe.
An rama Football khelh nge a tlan zawk dawn Sofia Balbi? Hetah hian Suarez-a career chu a intan ta. Sofia leh a chhungte chuan Uruguay atangin Barcelona an pan a, Suarez chuan a hmangaih awmnaa khawsak ve tumin hma a la tan ta.
Theih tawp a chhuah chuan Europe club tha ten an rawn ngaihven dawn tih a hrechiang, khawl ang maiin training a nei a, a thawkrim em em. Kum 19 mi a nih laiin vanneihthlak takin Dutch club Ajax chuan an rawn la ta nawlh mai. Suarez chuan Ajax tan theih tawp a chhuah chhunzawm zel.
A tum ber chu Barcelona pan a ni, Liverpool lamin an la leh te te phawt a, chutah a hmangaih awmna Barcelona chuan a that zia an hriat avangin an la ta nge nge a, Barcelona-ah nupui fanaute nen hlim takin an awm ho thei ta a ni. (www.inkhel.com)
Ivan Rakitić
Kum 2011-a Sevilla tana contract a ziah hma hret khan Rakitic chuan a hmangaih a tawng. A tuk lawk chu Sevilla tana contract a ziah hun a ni tawh, zanah a unaupa nen an thleng, Hotel bar-ah chuan mut hmain zu in zuai ang tiin an chhukthla, chumi zana an zu no dawm chu kumkhuaa a nun ti danglamtu a ni ta tlat mai le. Bar nghaktu nula chhe lo tak leh ngaihnobei tak Raquel Mauri a tawn zan a ni a, Rakitic chuan khaw dang a hawi thei tawh lo.
Rakitic chuan a unaupa hnenah chhelo a tih thu a hrilh, a unaupa chuan, "Engtin nge hma i lak zel dawn?" tiin a zawt, Rakitic chuan, "Sevilla tan ka khel anga, henu hi nupuiah ka nei dawn a ni," tiin a chhang. Chumi tukah chuan Croatian midfielder Rakitic chuan FC Sevilla tan contract a ziak ta a, chu hotel-ah chuan a cham chhunzawm ta bawk a.
Zing tin chu nu chu a hmu, a be ziah bawk. Zing tin date-puiah a sawm ziah bawk, Raquel chuan Rakitic-a sawmna chu a pawm nghal mai lo, thla 7 zet a liam hnuah Raquel chuan Rakitic-a sawmna chu a pawm ta. Rakitic chuan, "Ka nuna thil ka sualchhuah zinga harsa ber a ni chiang e. Champions League winner nih ai pawhin a har zawk, hun a va duh rei vang vang tak em," tiin a sawi hial. Raquel nen hian kum 2012 khan an innei a, nupa hlim tak an ni mek a ni.
Heng footballer chanchin tlemte kan han tarlan atang ringawt pawh hian huaisenna neiin nang pawhin i hmangaih i neih theihna a nih dawn chuan i theihna zawng zawng chhuah ang che, harsatna lian tak leh min daltu lian tak lo awm pawh nise beidawng suh ang che. Hmangaihna hi engmahin a dang thei lo a ni.