Footballer ropui te chu

20th February 2015, 02:02PM

Tunge khawvelah Football thiam ber ang ? tih zawhna hi a chhanna khawvelin a pe thei lo. Mimal tinin duh zawng leh thiam tih zawng kan nei vek a. Maradona, Pele, Zidane leh Brazil Ronaldo te hming tun tum chu kan lam ri hrih lovang, anni chu sawi lohva lum an ni.

Khawvela Footballer ropui tak tak sawi apianga an hming ka lam tel ziah turte lawr khawm teh ang :

Johan Cruyff -

European football history a hming dai leh tawh ngailo tur chu Cruyff hi a ni. 1970s chho vela Ajax leh Barcelona striker chhuanvawr hi 'Total football' ti ropuitu leh 'the Dutch John Lennon' an tih hial khawp a lar a ni. A hunlai khan European Cup vawi thum a chawi hman a, Ballon d'Or trophy pathum lai hlan a ni bawk. Kum 1978 World Cup hma lawk khan rinloh tak maiin national team atangin a inhnukdawk a. A hnua chhui chiangtute chuan an chhungkua kidnapping case-a an inhnamhnawih vang niin an sawi.

Michel Platini -

UEFA President nihna chelh mektu Michel Platini hi 1980s chho vela Juventus goal thun khawl a ni tih I hria em? Midfielder tha leh set-piece specialist ropui lutuk a ni. Juventus tana kum nga a khelh chhung khan Serie A titile pahnih leh European Cup a chawipui hman a. Kum 1984 European Championship a France an champion theih nan khan goal 14 lai a khung bawk. 1982 leh 1986 World Cup khan France chu semi- final thlenpui mahse World Cup erawh a chawi ve ta lo a ni.

Di Stefano -

1954 leh 1960 inkara European Cup final match zawng zawng ah khan Di Stefano khan Real Madrid tan goal a khung vek. Stefano hi Argentina ram ni leh sa ni mahse 1950s lai vel khan Spain in khua leh tui nihna a pe a; vanduaithlak takin kum 1958 World Cup khel tur khan Spain kha an tling zo leh ta lo anih kha. Kum 1962 a Spain in World Cup final an luh khan a ke hliam avangin Stefano khan a khel ve leh thei ta lo a ni.

Eric Cantona -

Premier League tihlutute zinga mi chu Eric Cantona kha a ni. Cantona hian 1987 khan France tan a khel tan a. Hemi hnu lawk hian an hunlaia France manager Henri Michel chu tawngkam mawilo taka a sawisel avangin international match khelh phalsak a ni talo a ni. Kum thum hnuah chauh khelmualah rawn letlehin kum 1994 World Cup final a France in Bulgaria an hnehloh khan a khel ve hman ta lo a ni.

Ryan Giggs -

Manchester United hranghlui Ryan Giggs khan a thatlai hun zawng zawng Old Trafford ah a hmang zo a. League title sawm pathum, Champions League title pahnih leh FA Cup medal pali a lakpui bawk. Club level a title lak theih zawng zawng deuh thaw la mahse World Cup no mawi erawh a chawi ta lo a ni.

Lionel Messi

Ballon d'Or vawi li lai dawng thei chu eng ang taka thiam nge anih sawi a ngai kherlo ang. Kum 24 anih khan Messi hian Barcelona FC tana official game a goal khung hnem ber nihna a hauh a. Kum 2014 September thla khan club tana a goal 400 na a khung bawk. Hei mai hi duh tawk lovin nikum November thla khan La Liga top scorer a rawn ni a. UEFA Champions League-ah goal 76 lai khung tawhin, goal khung hnem ber a la ni lehzel bawk. Hetihlai hian an ram Argentina erawh World Cup a la chawipui theilo a, 2014 Brazil World Cup-ah khan Messi hian World Cup a chawi teuh hle a, Argentina chuan Final lut mahse Germany lakah si khat faia an tlawm avangin Messi hian World Cup a chawi ta lo a ni.

Cristiano Ronaldo -

Ballon d'Or dawngtu leh FIFA Player of the Year nominee hian 2013- 14 UEFA Best Player in Europe award a dawng bawk. Kum 2014 January khan Cristiano Ronaldo khan kum 28 mi niin club tan goal 400 a khung hman a. Club lamah che tha viauin mimal chawimawina pawh dawng hnem viau tawh mahse player tha World Cup la chawilo zingah hian a langsar hle a ni.

Maldini -

AC Milan defender tha ber pawla an sawi thin Maldini kha kum 16 mi lek anihin football khawvelah a rawn lar chho a. Kum 24 chhung zet Milan defender rinawm tak a ni zui ta a ni. Serie A title pasarih an lak bakah Champions League no mawi kha vawi nga lai an chawi hman anih kha. Kum 2007 khan Champions League a Best Defender ah thlan a ni a. Hei hi a career a a thlensan ber a ni.

George Best -

Manchester United player chhuanvawr ni thin George Best kha a hunlai khan football thiam satliah mai a nilo, "the Best" kha a ni tlat. Manchester United bakah Northern Ireland tan a khel thin a. Club inelna lamah Man Utd chu league title pahnih leh European Cup a lakpui a. Club tana player tangkai tak ni mahse zu vanga buaina a neih tak avangin World Cup a khel ve thei ta lo a ni.

Copyright © inkhel.com 2024. All rights reserved.