"Kum 5 mi lek ka nih laiin ka pain min kalsan a, ka nu chuan keini unau pangate chu a theih tawpin min enkawl. Kan hautak em avangin ka nu chuan ni khatah hna chi hnih chi thum a thawk thin. Engtikah emaw chuan ei ka la zawng anga, kan chhungkua ka la chawm ang tih hi ka tum ber pakhat a ni.
"Italy ka pan hnuah chuan kar khatah £250 ka hlawh thei ve ta a, kan chhungkua ka chawm ve thei ta. Mahse Cagliari tana ka khelh laiin thih ngamin cancer vangin ka nu chu a dam lo tih ka farnu chuan min rawn hrilh a, Belgium-ah chuan ka kir vat a, ka nu chu kan dawm hlum ta a.
"Ka nu thih dawn chuan thil pahnih ka tiam, chu chu atan goal ka khung zel tur thu leh kan chhungkua ka enkawl zel tur thu a ni. Ka nu boral hnua ka game hmasa berah goal ka khung ta ngei a, kha goal kha chu a hlu bik khawp mai," tiin Belgian International Radja Nainggolan chuan a sawi.
Radja Nainggolan hi 1988-a piang niin, a nu hi Belgium mi a ni a, a pa erawh Indonesian a ni a. Unau mipa pali niin, a phir pui hi hmeichhia a ni a, naupang te an nih laiin a pa Indonesian chuan an ram lamah a hawn san leh daih avangin rethei takin an khawsa chho ta a ni.
A Football zin kawng
Thomas Vermaelan, Toby Alderweireld, Vertonghen leh Mousa Dembele te zir chhuahna Antwerp-a Beerschot Academy-ah a naupan laiin hun a hmang ve thin a. Mahse an club chuan contract an pe ve ta si lo, chu tih laiin Italian Scout te chuan an lo duh em em si a, Italy lamah a kal ta. Serie B club Piacenza chuan contract lo pein, kum 5 Piacenza-a a khawsak hnuah Cagliari chuan an la ta a, Cagliari tana a khel ta chiah chu Radja hi a inti thei khawp mai, "World class midfielder Pirlo te ka hmachhawn ve thei a, ka lawm tak zet a ni," tiin hahipin Serie A -a a khel chu a lawm thu a sawi a ni.
2014 World Cup a khel lo pawi a ti hle
Nikum World Cup-a Belgium National team-a koh a ni lo chu hrehawm a tih thu FFT hrilhin,"Witsel, Fellaini, De Bruyne, Hazard, Chadli leh Dembele te leh mi dang dangte, Belgium hian midfielder kan nei tha hlawm em em a, inelna a sang hle mai. Mahse tunah chuan ram tana koh ka ni ta a, World Cup ka khel lo erawh pawi ka ti hle a, tawn hriat tha tak tak nei thei ve tur ka ni a. Chutih laiin Euro 2016 qualifier-a Cyprus leh Israel kan hmachhawn tumin man of the match-ah min thlang a, ka hlim em em, Euro hi qualify ngei turin kan tang dawn a ni," tiin a sawi.
2014-15 season a khel tha hle
2010-2014 chhung khan Cagliari tan Radja hian a khel a, game 131 khelin, goal 7 a khung ve hman, he Belgian Midfielder hian 2014 khan Roma loan-in a zawm a, Roma chuan tha an tih em avangin permanent in an lalut ta a, Roma tan game 35 a khel a, goal 6 a khung thei a. Defensive lamah a tangkai em em, a passing a thain, ball a keng thei bawk a, pass hlauhawm tak tak a nei thei zel bawk nen, lehlam pawl ball chhuhsan kawngah tackling nei tha tak a ni bawk. Long shot a ngaina em em bawk a, khawvela football data provider lian ber pakhat Opta pawhin season liamta kha a khelh that em avangin 7.21 ratings a pe hial a ni.
Rajda hian Roma chu season tharah Champions League khel thei turin dinhmun thaah a dinpui ta a, Europe-ah tawnhriat a ngah ve tawh hle a, Season liamta Champions League-a an chet that loh chhan chu an team an la inbuatsaih that tawk loh vang leh an Group-a Man City leh Bayern Munich te nen an awm ho vang nia a ngaih thu a sawi a, season tharah chuan tha taka khelh tur leh Serie A title pawh chuh thei ngei tura an inbuatsaih dawn thu a sawi bawk a ni.
A pa a che thing hle
A pa Indonesian chuan 2013 khan an ram tlawh turin a sawm a, Radja leh a phirpui hi an han thlawk vang vang a, mahse an beisei loh deuh an tawn thu Rajda chuan FFT a hrilh a,"Ka pa chuan min rawn bia a, ka phir pui ka farnu nen chuan kan han tlawh dawn a, airport-ah te chuan Indonesian thisen kai ka nih avang leh tha taka Serie A-a ka khelh avangin min lo ngaihsangtu kha an lo tam mai a,
"Chutih laiin ka pa nena kan han intawng ta chu a zahthlak hle mai. Ka pa chuan ka larna hmanga amah chhawmdawl turin min lo ti chu a lo ni a, kan mamawh em em laiin min tlansan a, khami hnuah khan kan la inbe leh ta lo a ni," tiin a sawi.
Radja hian a nu hnena a tiam ang ngeiin a farnu, a phir pui chu a enkawl chhunzawm a, Football ngaina tak a nih avangin Roma hmeichhe Football team-ah a khel nghe nghe a, a ni pawh hi professional player niin, Ram tana koh a ni tawh bawk a ni. An hlawhtlinna te chuan a nu thi ta chu a tih lawm ve ngei Rajda hian a ring tlat a ni.
Roma-ah a hlim
Premier League chu khawvela league sawi hlawh leh ngaihven hlawh ber niin, a thiante inkhel a en thin thu a sawi a. Mahse tun dinhmunah chuan Roma tan a theihna hlan zel a tum avangin league dang hawi thei a la nih rih loh thu a sawi rualin engtikah emaw chuan insuan hun te pawh a awm a la rin thu a sawi bawk a ni.
Radja hian English defender Ashley cole chu a thian tha tak a nih thu leh player naupang zawkte a fuih phur thiam zia te, fiamthu duh mi leh mi nelawm tak a nih thu a sawi bawk a. Tunah hian Radja hi Belgium ramin rinrawla an hman chhoh mek a ni a, kum 27 mi niin, tunlai Europe-a midfielder khawng ber zinga chhiar tel a ni mek a ni.