Gareth Bale chuan footballer ho chu mahni duh anga khel thei lo nia sawiin, an nun hman chhoh danah an zalen lo hle niin a sawi a, robot ang mai an nih thu a sawi.

Welsh winger Gareth Bale chuan 2013 atang khan Real Madrid a zawm a, Spanish club lian chu UEFA Champions League title vawi 4 ngawt a lakpui hman a. Tun hnaia Zidedine Zidane kaihhruaina hnuaiah Bale hi a tla na lo hle a, Tottenham player hlui hi hmun danga chhuahtir an tum niin an sawi mek a ni.

Tun season chhungin Bale hian game 42 khelhah goal 14 chiah a thun thei a. Season tan hmain an thiampuipa Cristiano Ronaldo chuan Juventus a zawm daih a, Portuguese superstar a awm tak lohah chuan Bale hi a aiawh thei ber tura an dah niin, beisei anga a chet theih loh em avangin Zidane chuan chelh zui loh a duh hle.

Bale chuan professional football a luhchilh avangin a zalenna chu thui tak a thlah phah niin a sawi a. A thianpa, Wales defender thin Lewin Nyatanga chawlh chungchang sawi chhuakin, inkhelh a chawlhsan hnuah Lewin chuan chhungkaw tan hun a pe ve thei tawh dawn nia sawiin, hemi pah hian personal trainer anga a awm tur thu a sawi.

“Tunah chuan nunphung pangngaiin a nung ve thei tawh dawn a. A hma kha chuan professional footballer a ni a, mahni duh dan anga hun hman kha a theih miah lo a. Team boruakah chuan engkim a huhoa tih a ngai a, hun ruat bik a awm hnem em em bawk a, infiammi dang tam tak, golf khel thinte leh tennis khel thinte nen chuan kan inang lo hle a ni,” tiin Bale chuan a sawi chhuak.

“Mahni duh dana awm thei lo, mi ruahman anga awm kan nih avang hian robot ang chiah kan ni ber a. Coach te chuan kan awmna hmun tur, kan awm hun tur, thil ei hun tur, training neih hun tur thlengin min ruat sak vek a, an tih dan angin kan awm a ngai zel a ni,” a ti bawk.

A sawi zelnaah, “A nihna takah chuan kan nun hi engti kawng emaw tak chuan kan hloh zel a ni ber a. Ti tura min hrilh ang kan ti tawp ringawt mai a, mahni tha tih leh nuam tih ang zawng pawh kan ti thei meuh lo,” a ti.

Bale chuan, “Lehlam zawnga ngaihtuah chuan football khawvela kan inhman chhung hi a rei lo em em a, hei vang hian zalen loh phah pawh hi a awm ve viau tho a. Mi thenkhatin football khelh duh vanga nun zalen neih theih loh hi a inphu an tih laiin, thenkhat chuan inphu lo an ti ve thung a, thlir dan pawh a inang bik chuang lo,” a ti.